PATHIAN KA RINLOH CHHAN

Pathian hi awmse, Bible ami ang hian awm se, ka ngainatna leh ka ngainatlohna hi 50/50 ani vel ang. A mak tiru, Christian chhungkua ah kan piangin kan seilian a, kan rinna theuh dik kan ti bawk a. Chutah chuan denomination a hrangin kan awmleh vek a. Kan inhaw theuh a. Kohhran te phei chu kan hmusit em em a. Kan diriam a. Fiamthu nan kan hmang a.

Hetiang ka hmuh chang hian Pathian hi rin har ka ti em em thin. Rin inanga insawi, inneih pawlh khap si, kaldan inanglo, inhmusit em em bawk si. Mahni denomination a inhruailuh tum ve ve si. Social economy leh lifestyle thlenga indah hrang leh inla hrang. Hetiang Pathian hi keichuan rin ka duh miah lo. Min tibuaiin min ti hahdam lo.

Heng avang hian min dem em. Dem mai thei, midangte avanga Pathian rinloh duh hial chu tiin! Mahse Pathian hi hmangaihtu nise, ka rinlohna tur tawktarh hi min pek ka ring miah lo thung lawi si a. Mahse a hmangaihna lan nan hetiang hi kan tawh a ngai, tiin min hnial fo thin. Mahse engvangin nge mahni faduat lai, Engmah la hrelo hi kan hmangaih zia hriattir nana Pawngsualtupa hnenah kum 6000 chhung kan va dah rikngawt ang ni. Chutah Pawngsualtupa in alo pawngsual ta ngei a, kan fa ngei chu min hmangaihlo tiin mei ah kan la rawh fo dawn em ni? Keichuan tiang Pathian hi rin ka duh lo a. Kei aia mahni fa hmangaih lo hi rin ka tum heklo bawk. Uipui hmangaihna pawh a tlukin ka hrelo.

Hetiang sawichang hian "Pathianin duhthlanna(freewill) min pe" tiin min hrilh a. Bible ah engkim hretu Pathian tan hian keini hi Freewill pek chi kan ni em. Chess thiam em em ten an sa kal dan tur hrelovin an che thin a. Chu chu freewill a ni. Mahse a hre vektuin freewill min tih sak chuan ani chu Game siamtu ang lek ani a. Keichu a victim mai kan ni. Kan hma ah thihna leh nunna a siam a. Duh min thlan tir a. Kan thlan zawk thin chu THIHNA ani tih hre rengin kan chhialehtha hriatna min phut a. Mahse bible meuhvin "a chhia leh tha hriatna thei rah" eilo turin min duh lawi a. Tichuan chhia leh tha hriat phal silo khan Hmaah chhiatna pal palh tur min dah sak a. Kan pal a. Mei ah min rawh leh a. Tiang Pathian hi hmangaihna ani ngai dawn em ni???

Ni e, Pathian chu kan hriatfiah phakloh niin kan ring a. Kan duhthlanna min zah sak, kan ti a. Mahse, thihna, lungngaihna, tahna, hrehawmna, harsatna, retheihna, diriam tawk turin khawvel ah min siam meuh mai si. Tichung chuan "ka hmangaih che u" a ti a. Min hmangaih anih chuan Khawvela min dah hma te hian kan duhthlanna min siam se, chumi hnuaa kan tawrhna ata min pui se, hmangaihtu Pathian ani zawk hian ka ring thin. Mahse kan duhthlanna tel lovin leiah THLEMNA tawk turin min dah a. Kan paltlang zo lo va, mei a min rawh a tum fo mai si.

Pathian rin hi a chakawmin a thlamuan thlak hmel thin. Tawngkam thiamin an sawi phei hi chuan mittui alo hnam ve sawk sawk thin. Mahse, khawvel hi han en ila, kan nunkhua alo sei a, kan hriatna alo zau a, kan ngaihtuah tam pauh leh, engemaw hi diklo chu a awm a. Heng diklohna hi engvang nge ni ta ang?

Pathian siam ani, ti ila, thenkhat chuan an awi lovin Setana siam zawk ani, an ti thin. Anih chuan Engkimsiamtu khan engkim alo siamlo em ni? Siam nise Setana leh sual hi a siam ani mai lo maw! Setana hi a duhthlanna avanga sual zawk alawm ti dawn ila, a sual tur chu a hre ve vek awm sia, tinge a siam kher? Chu chu kan thu anilo, kan tileh cheu dawn em? Anih chuan Pathian mi famkim atang famkim lo hi a chhuak thei dawn em ni tiin zawhna han insiamleh ta ila. Entirnan, perfect white atang perfect black alo chhuak thei dawn em ni, a chhuak thei anih ngai chuan white pawh hi alo white lova, Pathian a THA pawh hi chawhpawlh nun alo ni a nga, a chawhpawlh pui pawh THALO alo ni tihna ani ve ta ang! Mitha hlang hlat Pathian atang a thalo anlo awm ve thei hi mak tak ani.

Vanneihna kan dawn changin Pathian remruat ah kan puh a. A puh a zawng chuan an thih chhan te hi Islam te hlei hlei hian Pathian remruatah an ngai zawk a sin. Mahse thihhnu piah beiseia Bible ring kur ngei nguai te hian Vanram kal te hi kan inringhlelh em ni aw! Kan chhung leh kua te anlo boral a, "ava vanneih em, thih ngailohna leh harsat awm tawhlohna ah a kal ta" kan intih sakleh duh thak lo. Chutih ahnekin a damchhuak chinah Pathian thiltih ah kan inbel chamchi lawi a.

Entirna siam ta ila, mi pakhat chu a hna atang an ban hlim chuan office kawtah a vei hnak hnak a. Motor-in tihpalh thilthuin Bank chhungah a hnawllut ta. Bank rawktu anlo awmlai mek a ni, hostage atan anlo la hmang zui a. Chuta karah police ten tihpalh thilthuin vawi 3 lai an misual kahthelh a leiah a taksa ah an kap a. Nikhaw hrelovin a awm zui ta!

Alo harhleh chuan abul ah doctor leh pastor an lo awm a. Pastor leh victim chuan Pathian zahngaihna leh ropui zia an inhrilh mawlh mawlh a. Pastor chuan "Pathian hmangaihna hi alo va tha em tiraw Doctor" a ti a. Doctor chuan mengphawk hra hian, "A hna a chan a, motorin a kawng hnuailam che tawh ngailo turin a su a. A dul leh awm ah silaiin police hovin an kap a. Thla thum nikhawhrelova a awm hnu ah A nupui leh faten an tlanbosan bawk a. Chu chu Pathian hmangaihna em ni?" a ti a.

Pastor leh victim chuan arual deuh thaw hian, "A/Ka nunna zuah ani tal a lawm!" an ti a. Doctor, "ani maw, Pathian chu han tihtir mai teh u" tiin a ECG monitor a phawi a, oxygen an peklai nen. "Pathian hnenah dam dil mai ru" tiin a kalsan a. A boral ta.

Kan damloh te, kan cancer te, kan ke a kak duai te hian Biak In ah tlan lutin Pathian engkimtithei a hnenah tinge damna dilin a dam hma chu kan tawngtailoh. Chutiang a hnekin Hospital minute 30 aia tlai lova thlen kan inpeih at lawi si. Biak In lam hawi chuan kan meng duh lawi silo. Doctor hmangin anlo dam ta reng a, Pathian kan han puhleh lawi a. Dam ta lo se, Doctor bawk kan thiamlo a, FIR hial kan thehlut leh a.

Kan chanthat tum hian Pathian tih kan tia, zavai boral tumin engmah Pathian tihah kan puh duh silo a. Enge a awmzia ni, Setana lakah pawh hian Pathian hian thu nei awm tak ani si a, Joba lehkhabu atang khan. Mahse chu chu ringlo an tam a, an nunpui bawk silo a. Tiang ringtute Pathian hi rin ngaihna hi ka hre hlawllo ani ber e.

Engpawh nise, Pathian hmuhtheihloh, Van a awm, engkim kan tih hretu leh min entu a awm a. Chu chuan kan zawm tur 10 min siam a. Amah hmangaih turin min ti a. Mahse kan hmangaih loh erawhin mei a rawh min tum a. Mahse, sum tel lovin a awm thei silo! Anilo em ni, engkim hretu leh engkimtithei khian sum tellovin engmah a titheilo ani em. Kohhranah sum kan chhunglut ruih ruih a. Pathian hi awm nise, sum tello hian kohhran hi a kal thei tur a nia. Mahse a kal silo.

Ka rilru dikloh emaw intia nge, thinchhia leh mahni duhdan a kal min ti a nge. Mahni duhdana kal zawk chu Isua kha ani. Theipui rah hunlovah a rah ava hmuhloh avangin ava hau hlum zawk kha a nia. Joba awm tha hle hle lai Setana sawisak turin a pe a. Juda Iskariota sual turin a inzui tir bawk a. Salomona lah a che chhe dawn tih hre rengin finna a pe a. Samsona lah chuti bawk. Hei hi Pathian hmangaihna em ni. Engkimhria hian hei hi kan rinloh phah nana a siam lo thei mai lo em ni..tichung hian hmangaihtu ani, kan la ti dawn cheu em ni.

Heng Bible sawi changa lo lang chiang ka tih thin chu Mosia kha. Mosia khan Exodus ah a thih thu te, a thlan an hmuh zawhloh te kha a ziak thei dawn em ni. Thuthlung Thar lamah lah Isua thlahtu te an ziak inanglo vek a. Mihring ziak ania, a sual thei, kan tia. Mahse "Thlarau Thianghlim hrin" tih erawh kan pawm duh silo anilo em ni. Mihring ziak zingah hian duh chin kan lo nei ani mai lo maw.