BIAHNEM

To,

Biahnemi

Khatia suamhmang nûnrawng tak anga ka tisa leh thlarau i râwk lai khan; ka nu ṭang belin i hming ka lam a, 'ka hmangaih tlat si a ni' ka ti che a! He khawvelah hian engmah natna nei si lovin ka rûm tlawk tlawk a!

REST IN PEACE(RIP)

Harsatna kan tawh changa fuihna ngeiawm ka tih êm êm chu, 'Pathianin kan tawrh zawh tawk tur ang zelin harsatna min pe' tih hi. A pa a boral a, a tawrh zawh tawk a nil o a, a zuang thla a, a boral a sin! A tawrh zawk tawk a ni lo a niang, a missionary-na hmunah tûma hriatlohin a boral a sin. 

He'ng mi te hian an tawrh zawh tawk harsatna an tuar miah lo! Inhnemna dang atan, 'Pathian chuan a hmu reng che a, a thlahthlam lo che'  te hi kan in tia. Min hmu a ni lo, a zuitute zawk hian inthlir tawnin, kan diklohna hi kan insawidarh sak zawk mai thin a ni. Mahnilo-maha chaklo intih ve nak lai hian, min thing a, min sawp a, min diriam a. Kei, Van ami khi be eih thei ngat ila chuan, insumkâr nei lek lo a rel ve mai duhna che u ka nei thin!

HMANGAIHNA AN TIH KHA...

Taksa chak lova min siam a, kâwmkar leh hmun khawhara min nam lut a, hringnun hi mumang mai ni se tih min thlan tir fo tu a ni. Thi lova fam min chan tirin, ṭawihral lovin kuangah min zalh a! Mal leh rethei taka min siamtu, tlai hlim ral anga min ral riai riai tir tu a lo ni! 

Lehkha pawhsawm angin min pawt sawm a, sathau ang maiin min fâr ral tir a, zungzamah reh lovin min fan chhuak si! Hausa leh pachhiaah lainatna rêng rêng a lan tir ngai lova, thlanfim tla khawpa zakin min siam fo ṭhin! 

He thinlung, thisen a lo bet ve tlat hi, nang, 'Hmangaihna', ka paih bo theihloh nan che keimah ngei i lo ni si a maw!? Paihbo tur che hian khandaih rawih kher a ngai em ni?

PATHIAN KA HMU

Nûn hi nuam ka tihna êm êm chu, nang ilo awm leh zel hi a ni. Ka khawloh leh diklohna hmuhkanin min vuan a. Vanram beisei leh chuan hi ka va mamawh lo tak êm; ka mamawh engkim hi i bulah a awm vek mai si a. Aw, Pathian i ni em ni? Biak ka chak êm êm reng mai che hi!

HMEICHHE LEPLER

19th chhoh vela French mi Charles Baudelaire-a Poem, The Flowers Of Evil' ah khan hmeichhe leplerna chu a diriam hneh khawp mai- 

Aw..Hmeichhia, Ramhuai tenawm, Dawrawmna tenawm, an rinna che thisena chantirtu; Thatna hi nuihza siamna bûrah i chantir lek fang a! Sêh tur zawnga Chinghne beram vun sin Mithianghlima inchhal vak vel ruai ruai ang chu nangmah ngei hi i ni!

FAM MAFAA HAUHNAR TÂN

Nimin kha Fam Mafaa boral cham niin ka hria. A damlai hmel hmu ngat ila chuan, 'Sieng Heil Salute' pe ngam ve tur ka ni. Ama puala thûziak nei ve ngêi ngêi tur niin ka inngai bawk. Amah Mafaa an sawi duh dân te rêng mai kha,'Zu rûi nasa, kelawnga zân vak ṭhin' an ti a, an nuih sawh a, an diriam ṭhin. A sawitute kha in zak zawk fû lo maw.

Zu vanga insawi hnawm fo ṭhin lai Khawvel miropui tâk tâk te hian zu hi misual teh nân an hmang ngai lo a. Chutih rualin an fak zawk emaw tih mai tur a ni. Ziaktu ropui Slyvia Plath, 'The Bell Jar' ziaktu chuan Zu hi ngaihtuahna hnar ber a ti a. Rabelais, French mi, Greek scholar nihna nei, Physician ropui leh ziaktu lar êm êm pawh khan, "Ruihna hian suangtuahna min pe a, ka suangtuah apiangin ka rûi ṭhin" a ti bawk. Amah Churchill, Khawvel ramtê zinga tuman an la hneh ve ngai loh ram hruaitu leh Indopui pahnihna hunlai pawha zâm ngai lo pa rûmrût hlei hlei khan, "Wine tel loa ka phuh chhuh aiin Wine tel ngêi a ka lâk luh a tam zawk e" a ti hial!

Kan Mizo literature kungpui, ropui êm êm kha Sakhaw tarmit aṭang hmuh tlin a har a ni mahna. Nangni chu Inchhung lumah lehkhabu nena inchhawpin lehkhabu siam in-tintuah a. Ani kha chuan siliper nên chauh Khawlaiah lungleng leh khawhar êm êmin a awm a, a rilruah ziah tûr a lo lut nghal zûng zûng zawk ṭhin a sin. Zam suh Fam Mafa, Rom mite tih dân ang takin kei pawhin i hnung kan la rawn zui ve ngei ang!

Nungchang mawi leh hlû ber a liam ta.

I kalna ramah chuan Angelte'n- an Thla khawngin lo hmuak che rawh se!

Mafaa Hauhnar