EXAM KA KAL KAN THEI LO

Emma Hauhnar 

Exam thiam kha lehkha thiam ai khan a lo pawimawh zawk ani maw...??? te kan ti leh ta hnuhnawh a. Zirnaah pawh hian fin ve ker alo ngai ta riau anih hi. Zir tam tluk chu a awm lo nangin, zir dik kha alo hlu zawk viau anih dawn hi. (Study hard aiin Study smart).

Question khat zelin mark 20 a put si chuan a tlem berah question khat zelah answer phek 8 tal chu beisei kan ni ve miau sia le. Dar 3 chhung in sap ṭawng ngeiin phek 32 tal han ziah tlin ve tumin kan English thiam ve ṭawk ṭawk kan han fawm khawm a. Pawl 12 kan nih laia Mizo kan exam a essay kan han ziah pawh a mark kan hmuh ṭhat loh teh lul nen. Mahni tawng ni lo a phek 32 lai mai han ziah par par chu huphurhawm ve thaw khat bawk a, ka english thiam zawng zawng (ka theihnghilh ṭhenkhat ka ngaihtuah chhuah leh te nen) ka hmang kim thaw khat viau ṭhin hle.

Question sheet a lo thleng chiah a, rilru in ṭawngṭai malh malh pah in 'Ka zir alo chhuak em? tih bak ka ngaihtuah thei tawh lo. Ka zir lo chhuak lo ta se, 'Question an set thiam lo lutuk a' ka tih ngei ka ring. Ka zir leh zir loh pawh a lo chhuah pawlh ta nuk a, a set thiam nge thiam lo ka sawi thei tawh chiah lo. Mahse alo chhuah palh tak hlauhin tia ka lo en thuak te pawh alo chhuah ve takah chuan, 'Topper nih tum aṭang 'Pass ve hram hram' nih ka tum lai kha mitkhap kar ve lek ani hial ang chu! Chubakah, ka subject lak hi nuam ti taka la ka nih avang nge, ka thiam a tawp chinah chuan min zawh bak thleng ka ziak ta nuaih mai. 'Thiam loh pawn attempt kim vek hrim hrim tur' tih kha kan thupui ani miau sia, zir miah loh te pawh kha a awm ang taka kan han ziak chu mahni inbum ni mah ila, a awm ang chu ka ti ve khawp mai (ka rin aiin ka lo bawn ve reuh ka inti hial).

Ka ziak zo paper ka submit dawn a, ka classmate ten paper an han dil belh chu mak ka tih rual rualin ka huphurh pui viau mai (chhuak hmasa ber dawttu ka ni ziah sia, a hmasa ber chu class a ka thutpui ber a hming tak tak pawh a kan koh phalloh Mohandas kan tih ania). Ka chhuah hma thin na chhan pakhat chu a vawt em a, ka tha na hian a tuar thei loh vanga nilum ai thuai thuai ka duh thin vang kha a nia (ka chhuanlam nge, na lo pawh nise ziah tur ka hre tawh dawn chuang si lo a). Chu mai pawh chu anilo rilru in thingpui dawr lam a hawi tan tawh tlat a. Ka thian dang ziak rei deuh deuh ho chu nghak lem lo in a ngai te te khan dawrah thingpui kan in leh malh malh laiin ziak rei deuh deuh ho khan an thiam loh zia sawi chungin an rawn in ve chu, hneawm tak ani. Ka answer sheet leh an answer sheet hi buk ta ila engzat takin inthlau ang maw!

Mahse hun kal tawh avanga rilru tih hnual a tha lo tih pah in thawveng takin result chhuah hma chu thawveng tak a awm kha a tha ber tawh zawk a, chubakah exam kan zo bik riau a awm kha kan tum lawk sa a lo ni bawk nen, kan vacation theuh kan duh ang taka (emaw chhungte duh ang takin) hmang tur chuan Mizoram University main gate bulah chuan university reopen hma atan chuan kan inthlah ta a. Ka rilru te te in result chhuah hunah kan inhmuchhuak thar leh ṭhin anga, semester tin hi 'inhmuhchhuahna semester' tiin hmasawnna awm lem lo in kan University Years chu kan thlah ral leh mai dawn anih hi tiin Tanhril kawng chu ka lo tlan pel der tawh mai.