Midang chhiatna sawi reng hi a hrisel lo tlat! A ngaithla tu tân lek phei chuan thil ninawm tak a ni. Midang chanchin chhia kan sawi fo hian rilru hriselna kan hloh a. Hlimna hmuh a ti har a, lawmna hmuh tur a awm hek lo!
Mahni tih ṭhat sawi reng te, midang laka kan thil ṭha tih sawi reng te pawh hi midang tân hriat a ninawm thei bawk. Kan hriat loh laiin midangin min ei lo thuai ṭhin. Min ei loh avânga thil ṭha tihloh tur tihna erawh a ni lo.
Tam tak, midang chhiatna kan va hrilh te hian an ngaithla peih lo a nia aw. Mihring beng hi chhiatna chauh ngaithla tur a siam a ni lo a. A ninawm ṭhin. An ngaithla peih lo. Kan hrilha te hian kan dik lo zawk tih min hrechiang tulh tulh zawk.
Chubakah mi hi kan duh danin an awm vek dawn lo. Kan ngaihdanin an awm vek dawn lo. Kan duhdan anga an awm loh vangin an chhia a, an sual tihna a ni lo. Tihtauh leh thinrim ah keimahni kan insiam zawk ṭhin. Misual tak anga midang ngaih nghal hi a dik lo. 'Kan thu lo' tih hi mahni kan inhrilh hre fo tur a ni. 'Ka dik ber' intihna tlangsang tak aṭang hian tu ṭhatna mah kan hmu ngai lo a nga, lungawina pawh kan nei ngai lo ang. Tupawn ṭhatna lai an nei. An ṭhatna lai hi hriat sak ve tur. An chhiatna chauh sawi lo hian.
Mi thiltih hi, kan duhdan a nih loh avâng ringawtin kan chunga ngaihdam dil tu man an ba lo a. Tin, an thiamloh lah a ni reng reng lo bawk!
'Ka dik vek bik lo' intihna hian mahni leh midang kan ngaihdan ah BALANCE min siam a. Nun hahdam, rilru hrisel, thau tung tungna, hmelṭhatna leh pian nalhna thlengin a thlen thei a nia!
Mihring kan nih angin kan nun kawng tinrengah hlut nih kan duh vek a. Hnathawhna hmunah pawh ni se. Tin, chhungte, ṭhiante emaw, kan kawppui emaw nena kan mimal inlaichinna ah pawh ni se, hlut nih hi a pawimawh hle. He'ng ah hian kan inngaihh hutna ṭha, mahni hlutna, kan inhriat dân leh khawvela kan inlan chhuah dân hi a pawimawh hle a. Mihring anga ngaihhlut nih hi kan pianpui dikna chanvo a ni.
Mipa chiin hmeichhe chi a hmu a, a belhbawm aṭang khan kan pianphungah hlutna kan nei vek tawh a. Tumah piang danglam bik kan awm lo. He planet-a mihring zawng zawng hi pian dân inang vekin kan piang a, hun khat kan hmang vek a- thihna. Tumah hi midang aia hlutna nei tlem leh hlu bik an awm lo!
Mahse, midangin an dinhmun aṭang kan hlutna min rinhlelh tir an tum thei, chutiang hmuna kan chên tlat avângin. Vanneihthlak takin he inbumna hi a dik tihna a ni LO. A awmzia chu nangmah ngaihlutu che leh an ngaih hlutna hmun i zawn a ngai tihna chauh a ni. Chuvangin vawiin hian i hlutna chu chhungril aṭang a ni tih hriat nawn tir che ka duh a, i nunah danglamna ṭha nasa takin thleng mawlh rawh se.
Kan vanduaina lai pawh a awm. Kan ṭhian ngawih ngawih emaw kan unau ngawih ngawih, kan mamawh tih an hriat ve leh a an zia danglam ta thut hi inhre ve tawh em? Miin min mamawh hian kan lawm zawk tur a ni lo em ni? Lawmna aia mahni dinhmun ṭha uan-pui kual vel nuam kan ti tlat hi a pawi a ni. Ho tê ah pawh kan dinhmun uan pui duh tlatna rilru hi a hrisel loh thlak tak zet!
Entirna atân meichhe sikuti khalh thiam ṭha lo hi a bula awm te'n an lo kian zel a. A theih tak emaw a tih phah ṭhin. Midangin min lo en rem ve ṭhin avânga keimahnin kan theih tak emaw kan lo intih theihna lo zahthlak tur zia hi aw!!! Miin kan dai sual hlauin min dawm a, keimahni thawh rah emaw tiin a bêrah kan in ngai a. Kan chapo zui a. Midang kan hmusit ṭha duh lo tel leh nghal a!
Kan theihna emaw kan tihah hian rilru ṭha leh hrisel tak kan nei tel tur a ni. Engvanga he theihna nei hi nge kan nih tih te pawh a chhan leh vang kan ngaihtuah tel tur a ni a. Kan thawhpui, kan chenpuite avânga lo mawi ve reng hi kan ni thei a nia. Inenfiah fo ang u.
.jpg)
No comments:
Post a Comment