Tunlai chu post pawh a awm khat riau mai ka ti. Keilah chu ka hman thathum der mai bawk silo a, mahse rilru a vei erawh paihbo hi a har a, ngawih reng te hi alo har a nih hi. "Mi a chuan sawi tur a hriatloh avangin a ngawi a, mifing chuan sawi tur a hriat avangin a tawng thin" , tih te pawh a awm kha maw. Puak leh phawng mai ang, dik tak leh rintlak ngeiin aw niang.
Satana hian a chance neih hi a hlauh ngailo tih chu a chiang; tun thleng hian tar at a nei ngai lo a, a fing telh telh zawk a nih hi! Pathian ruahmanna pawh hi mihringin a ngaih pawimawh em em luatah a zul ah zar zar satana hi alo che ve zel a. Pathian thu hi a hrelo niloin a hriat bel em avangin thei ei chungchanga Pathian(elohim) sawi pawh rawn debate ngam ngat kha a ni reng a; Pathian(elohim) anpui(image) ngei pawh hi a bawklawka lain oneness leh trinity debate tanfungah a hmang zak zak a, a kara Pathian thu sawichhiatna awlsam tak, satana tactic hi hai rual a nihloh nen ringtu inti tam tak chu a man bet tlat chu a nih hi maw.
Trinitarian hoin Pathian anpui mihring entirnan mihring chu taksa, rilru leh thlarau inzawmkhawm a ni an ti a. Oneness lahin mihring hi Pathian anga siam a nih chuan Pathian hi pakhat a ni tih tanfung an chhawrdawh luah mai! Kei erawh chuan he debate-na lungphum hi thiah ka tum lo, tum thei zia zang pawh ni ila denomination rilru hi ramhuai pai beih ai pawn a hahthlak zawk. Mahse Pathian anpui a siam mihring hi engdang mah a nilo, Pathian anpui a ni tawp mai.
Bible hian chiang em emin mihring nihdan tur a sawi a. Mihring chu Pathian anpui siam a ni a, thilsiam zawng zawng chungah thuneihna hlan a ni bawk a. Sam ziaktu chuan mihring chu Pathian aia hnuai deuh chauh a nih thu a sawi bawk. Thuhriltu ve thung chuan mihring rilru-ah chuan chatuan(eternity) a dah bawk a ni a ti. Mihring nihna chu perfect, a domain ram pawh lei ngei mai, satana thlaktu tura Pathianin a siam a nih hi a rinawm zual bawk a ni.
Heti hi lo ni se denomination tarmit atang thlir ang aw..Gen 1:26 ah chuan mihring chu Pathian(elohim) anpui a siam a ni a. Denominationist ngaihdan anga mihring hi siam an nih ve leha Pathian ang(likeness) nghal, perfect nghal a nih chuan context dang hi a fuhlo zo vek dawn a ni; Satan'n mihring a bumthlu tlat mai hi! Mihring hi Pathian ang a nih nghal chuan satana beihna leh thlemna mai mai hi chu a hneh tur zia Isua(Yeshua)'n tlemna tawh atang khan a chiang a, tlu thei rual an nih loh zia leh, satana hian chibai buk hial a buk zawk tur a nih hmel daih. Bung 2:16-17 ah chuan mihring chu thithei(mortal) a nih thu a sawi bawk a. Anih chuan mihring hi Pathian anpui a siam ni mahse, Pathian hi suddenly a ang nghal tawp mai a ni lo tihna a nih chu.
Bawhchhiat tur awm lo a bawhchhiatloh hi perfect tihna lam a nilo a, mahni nihna ang phak lo hi perfect a nih ngaihna a awm hauh lo bawk. Mihring hi eden huan a thlemna an tawh hma khan perfect lo, Pathian pawh la ang lo an ni zawk a.. Law leh order-in a khuahkhirh ngai hi perfect a ni lo tihna a nih chu.
Anih chuan mihring chu Pathian angpui(image) a siam, Pathian ang(likeness) a thanglian tur alo ni ta zawk a. A awmzia chu naute pianghlim chuan organs a nei kim biai a, physical develop chiah a ngai ang deuh hi a ni. Chu chu satana pawh khan hriain innocent annih lai takin a thlemthlu keuh reng a ni. Mihring hi engvang nge innocent khera a siam hmasakna chhan zawhna pawh hi ngaihnawm fe ala awm a nia(sawi thui rihlo phawt ang). Satana thlemna ah khan mihring hi tlulo ta se act knowledge lamah pawh hian ru ra tak a nih a rinawm ta a, satana ngei pawh hi mihring thuhnuai ah a awm ang a. Tunlai science thiamna zawng zawng aia let tam, Pathian(elohim) an tak takna, divine science hi a vir mup mup ang tih Isua(Yeshua) khawvela a chettlat dan atang hian a ngaih theih mai bawk a. Khawvel hi bawhchhiatna avanga anchhia lawhloh ni ta se; solar system hi mihring te hian choka ang maia hman anih a rinawm bawk a nih chu. Mahse chung zawng zawng chu mihringin a bawhchhiat ni khan a hlauh vek thung.
Pawi ber mai chu mihring suala tlu hi a ni a. Lawmawm ber chu Pathian'n a anpui a mihring a siam hi a ni. Davida chuan mihring originality ril zia hi a hre chiang em em a, "hlauhawm tak leh mak taka siam ka ni" a ti hial a. Mihringah hian midang te hmuhfiahloh, mahni pawh inhmuhfiah theih chuang bik hauhloh, mihring nihna zeril tak a inphumru a. A ril zia hi chhut tham a tling. Satan'n alo domain ta daih mai hi vanneih ava inti dawn lua em. Heng zawng zawng hian Pathian thlarau tello chuan engmah mihring a nih tawhloh zia te hi ngaihtuah a ti tling a...mihring nihna chu meihawl ling tha tak ang hi a ni a, a ling that em em laia tui a lei chuan a thi a, a ling tawh ngailo. Ling leh tur chuan meiling bulah a awm a ngai leh a, meia leihlum a nih avagin ling leh mai tur pawn hun a duh rei ve viau tawh ang.......
.jpg)
No comments:
Post a Comment