Mihring Tlarau Zir Chianna

Topic hmasa lam ah 'RAMHUAI LEH KEINI' chungchang; physical material hmanga minlo thunun theih dan leh KJV-in 'possess' tia a lehlin hi 'influence' zawk alo nih theih zia te, thlarauthianghlim tel lova vawikhat thawk pawh hi alo hlauhawm zia ziah ani tawh a. Tun ah ve thung chuan mihring hi enge, thlarau hi enge, mihringa thlarau hi enge alo niha thih hnuah pawh he khawvel a vak vel ruai ruai leh mi tihthaih theih ani chiah em, tih te ziah lan a ni dawn a. Kum 3000 chuang Setana bumna a ni a. Kan hailan dawn avangin Setana hian a mualpho loh nan tan a la nasa em em dawn tih hriat erawh a ngai thung a ni.

MIHRING  HI ENGE?

Theologian leh pastor hrang hrang tena mihring hi thlarau nena sawifin nghal tawp mai an hrat zia hi ka ti thin. Gen 2:7 “Tin, LALPA Pathianin leia vaivutin mihring a siam a, a hnârah chuan nunna thaw chu a thaw lût a: tichuan mihring chu mi nung a lo ni ta a” tih a ni a. Mihring hi minung nih tir nghal tawp mai hi a dik lo, mihring a siam zawh hnu ah minung (living soul/nephesh) a lo ni chauh zawk a ni. Minung nih nan nunna thaw(neshamah) a thaw lut a, chu thaw chu 1 Korinth 15:45 ah “Chutiang bawkin, ‘Mihring hmasa ber Adama chu mi nung a lo ni,’tih ziak a ni; Adama hnuhnung zawk chu nunna petu thlarau a lo ni a” a ti a. Tichuan mizo tawng hausakloh a leiah mihring tih leh minung chu kan hman pawlh ta nawk mai a. Mahse Genesis ziak atang kan hriatchhuah tak chu ‘mihring’ tih hi ‘taksa’ sawina ani tih hi a ni. Hei hian taksa chu a nunglo ang bawkin mihring pawh hian nunna thaw a dawn hma chu a nung bik heklo tih a tilang nghal bawk a ni. Greek philosophy pawn ala pawlhdal reng reng loh Solomona ngeiin mihring chu vaivut mai  a ni tih chu hai rual lovin a sawi bawk a nih kha (Thuhriltu 3:20).

Gen 2:7 ah chuan Pathianin a anpuiin mihring a siam thu kan hmu a. Hebrai ah chuan ANPUI hi  basa - lem tih  niin, English ah chuan ‘phantom/image’  tih a ni. Pathian chu thlarau a ni a, a anpui mihring erawh chu taksa neiin a siam daih thung a ni; Pathian a anna lai chu topic dangah kan sawi dawn nia. Nimahsela Pathian kan anna lai hi taksa (nephesh) chu a nilo tih kan chiang a. He hebrai tawngkam English a an lehchhuah dan chik vang vang pawh hian ‘power’ lam ah minung hian Pathian kan ang tur anih hmel daih zawk bawk a ni.

Tin, Gen 3:19 ah “vaivut i ni a, vaivut ah i kir leh tur a ni”  tiin mihring (Adama) chu a hrilh a. Thuhriltu 12:7 ah vek “vaivut chu a awm angin lei ah a kir leh a, thlarau chu a petu pathian hnenah a kir leh a ni” a ti a. Achung lama taksa kan sawi tak, mihring tih bawk hi vaivut mai a ni tih a hriat theih ta a; chu chu English tawnga ‘soul’ an tih bawk chu a ni. English Bible tam zawk hian ‘spirit’ tih ten alo hmang khang lang leh erawh hi chu hriatpawlhloh hram a tha. Kum 2000 lai buaina alo ni tawh a. ‘Spirit’ tih hi mizo tawng chuan ‘thlarau’ tihna a ni mai a, chutiang chiahin ‘soul’ pawh ‘taksa/mihring’ ani leh mai bawk. Kum BCE 3000 liam tawha Setana bumna(deception) turu tak a ni a. Kum 2000 deuh thaw Greek leh Latin kohhran upate khan anlo hman pawlh mai bakah inhnialna tam tak alo chawkchhuak tawh anih kha. Tunlai English Bible te pawh hi chik chuan ‘spirit’ leh ‘soul’ hi anlo buairu ve fu tih an hman lawr duah danah hian a hriat em em mai bawk. Entirnan, thlarau sawi nan ‘soul’ hman tum a awm a, taksa/mihring sawi nan ‘spirit’ hman tum a awm leh daih bawk. Nimahsela Pathian thu hi thunung, da ngailo leh chawhdalha bo hlen tur ani reng reng lova, ‘soul’ anih chuan ‘taksa/mihring’ sawina a ni a, tin, thlarau sawina anih chuan ‘spirit’ hman mai hi Bible bu pum  thu leh hla kalhmang tur dik tak zawk ani.

MIHRINGA THLARAU

Gen 2:7 ah chuan  mihring ah chuan nunna thaw a thaw lut a tih a ni; Chu thaw chu tinung tu pawh a tih theih  ani tih pawh kan hria (Gen 6:17).  Tin, taksa  pawh chu thlarau tellovin thi alo ni ta tih a ni bawk a(Jakoba 2:26, (Zakaria 12:1, Joba 27:3).

Ngaihtuahna hmang ang le; boruak kan hip luh a, kan thawk chuan engemaw kan ngaihtuah thei ani tih kan hria tiru?! Tin, darkar 24 ngawt mai thaw miah lovin han awmleh tai la, ngaihtuahna a bo leh nghal mai ang. Achhan chu boruak kan hipluh loh vang leh kan thawk a tawp vang a ni. Tichuan kan manfiah ta mai em; ngaihtuahna leh rilru awm tur chuan ‘thawk/thaw’ kan mamawh tihna anih chu. Chu chu adik zia Bible-in tihian min hrilh a, ‘A thawin a chhuahsan a, ani chu leilungah a kirleh a; chumi ni ngei chuan a ngaihtuahna te chu a bo ve nghal a ni(Sam 146:4)’ tiin. Tin, Bible vekin tihian min hrilh leh  a,  “mi thil min hriatthiam tirtu chu mihring a thlarau awm, engkimtitheia thaw chu a ni(Job 32:8)’, hetah hian ngaihtuahna leh rilru siamtu leh rilru min neihtirtu chu ‘thlarau’ ani tih min hrilh leh ta a ni. Tichuan ‘thaw’ leh ‘thlarau’ chu thil pakhat sawina alo ni ta reng a, Hebrai tawng chuan ‘ruach’ tih a ni a, Greek tawng chuan ‘pneumah’ tih a ni bawk. Hei hi ngaihtuahna, rilru, emotion, reasoning, hmangaihna, hlimna, hrehawmna, natna..adt zawng zawng hriat theih nana min nawr kaltu leh conscience(ngaihtuahna fim) siamtu chu alo ni ta reng a ni. Zu rui leh rulo pawh a thawk(Inrespirate)loh chuan ruih luat leh zu intamin engmah kawngro a su lova, rukru pawh a thawkloh chuan a rukin awmzia a nei hek lo. Achhan chu enge? Thaw lo leh boruak hiplut lo chu MI THI(DEAD) tihna a ni .

Entirna pakhat han siam lawk teh ang, motor hi amahin a lir tawp lo tih chu kan hre vek a. A petrol bawm ah petrol a awmloh chuan a lir thei miahlo. Heti chung pawh hian ala lir nghal mai lova, battery atanga petrol rawn nawr alhtu energy(thahrui) a awmloh chuan a kal thei miahlo a ni. Hei chu Automobile engineer-in an sawifiah thiam zawk ang sawi thui lo ila. Mahse heta tanga kan hriat thei ta erawh chu taksa/mihring hi nung a ngaihtuahna leh rilru nei thei tura rawn nawrtu chu ‘thlarau(spirit)’ hi anih ve avangin ENERGY emaw FORCE emaw VITALITY ani tih kanva mamfiah ta thung  a nih hi (Figure 1). Pawm a harsa em? Nge kan pastor te sawidan nen a inanglo zawk? Ni e, hei hi kan buaina bul kum 2000 hmalam daiha Setana thilthup rawn hailanna anih avangin pawm a harsa em em ang. A mawl thei ang bera sawi anih bawk avangin a ‘thlarau’ hi alo ho awm e te pawh kan ti mahna! Mahse kan bopilna hi a ril em em si a. Awlsam te a hriatfiah theih hi kan taksa peng pakhat ang maiin a diklo zawk kanlo pawm bur hman tawh a ni a, a pawi ngawt mai!

Tichuan mihring tinungtu, kan thaw hi keimahni puakchhuaka kan neih ala nilo leh cheu va, Genesis ziak angin mihring chu minung alo nihnan Pathianin a hnar ah nunna thaw a thawlut tih a ni a. Tin, Joba ziak vekin chu thaw(thlarau ni bawk chu)  chu  Pathian thlarau  a ni tih a sawi bawk anih kha(Job 32:8)!!  Heti zawng hian sap tawngin han sawi ta ila ‘life giving energy’ a nih zawk avangin tunlai kan inzirtirna nghet tak anga mihringte bawhchhiatna ah hian  bawkchhia a, thi a, a taksa chu vaivut ah zalh a, thlarau erawh chu khawvela vak vel ruai ruai tur ani lova. Pathian thlarau, nunna atana kan hman hawh a ni a, Eden natna emaw bawhchhiahna ah pawh khan a tel ve lova, a huam hek lova, thi thei leh nung leh chuang tur lah a awm heklo bawk a ni. Thawnthu, thutak ang hiala kanlo ngaihtak thihhnu a vak vel ruai ruai thin lam phei chuan Bible hian kam khat emaw a puitu atan chhunhan khat pawh hi a hmang lo bawk a. Hemi theory/theology hi chu Genesis- ah bawka Pathianin “in ei ni la lain in  thi ang” a tih kha Setana chuan “thi lovang” a tih bumna kha ani zawk a. Mi an thih reng rengin Pathian sawi anga thi a, ngaihtuahna pawh nei lova inzirtir mai lovin, Setana bumna zawk “thi lovang” tih ring zawkin mi an thih hian an thlarau chu la nung a, khawvelah vak vel ruai ruai a, ami huat zawn deuh leh ngei zawng deuh hran khum a, ama tana tha thin te chu awmpui zel angin kan inzirtir a, kan ring ta thup mai a nih hi. Ava pawi em! Dik tak chuan Bible hian mi an thih hian an ngaihtuahna leh an rilru pawh bo a, awmlo ve nghalin min zirtir zawk a, chutih laia ngaihtuahna leh rilru te neih tir a, phuba emaw an lawm zawngte awmpui thin emaw, vanram leh meidil te kanlo han kal tir vel hi chu hei bak baka BIBLE KALH hi a awm dawn emaw ni le??!!

Khaikhawm ang le, taksa/mihring hi vaivut atanga siam ani a. A nunglo tih chu kan hre ta a. Tin, thlarau pawh chu ENERGY ang chauh anih avangin thawh tur leh hna a awmloh chuan engmah a ni lova, a nung hek lova, a tawng thei hek lova, a tap thei heklo. Mahse taksa ah hian thlarau hi ava luh chuan energy a insiam a, mihring chu minung alo ni ta a. Alo nun miau chuan Bible sawi angin ngaihtuahna pawh alo insiam ve leh nghal bawk a. Chu a ngaihtuahna ang zel chuan alo tap a, alo nui a, alo hlim a, alo tawng a, alo kal a, alo fel emaw alo sual ta zel mai thin a ni. Achian zawk nan Radio hi entirnan han siam leh zuai ila, radio hi news, music ngaihthlak nana tangkai em em a ni a. Khawl te reuhte hi alo tawng zet zet mai a nih hi. Mahse kan chik chuan radio hi battery hmang chi anih chuan battery tel lovin news leh music a ngaihthlak theih miah lova, chutiang zelin current hmangchi pawh lo nise. A awmzia chu battery kha amahin a tawng thei lova, news emaw music pawh a pechhuak thei heklo. Tin, radio pawh battery tello chuan amah ngawt chuan news leh music a pechhuak thei bik bawk lova. News leh music pechhuak tur chuan an pahnih hian an inzawm a, energy alo awm a ngai thin a ni. Hetiang chiah hian thlarau leh taksa hi a mal ve vein minung an ni lova, ngaihtuahna hran nei an ni heklo. Sawi tak angin tunlai zirtirna ah chuan thlarau hi keimahni tak a ni a, ngaihtuah thei leh rilru nei tak chu a ni, an ti thin. Mahse Bible hian chu chu min zirtir leh min hrilh ani lova, “mihring chu a thlarauvin a chhuahsan a, chumi ni ngei chuan a ngaihtuahna pawh a bo ve nghal” a ti mai zawk a ni. Chumi awmzia chu thlarau hian amah ngawtin ngaihtuah theihna leh rilru a nei reng reng lova, taksa/mihring nen anlo inbelhbawm a, reaction alo awm chauhin ngaihtuah theihna leh rilru alo awm chauh zawk a ni. Tichuan Bible a kan hmuh fo, taksa + rilru + thlarau= minung tia kanlo hriat thin kha a dikloh zia kan va manfiah ang a, taksa + thlarau(rilru)= minung alo nih zawk zia pawh kan va hmuchhuak dawn ta a ni. Mahse hemi avang hian Bible kan kalh tihna ani bik hauh lo. Achhan chu taksa, rilru leh thlarau philosophy hi kum BC 300 daih tawha Greek ho mithiam Plato, Aristotle leh an sakhuana ril taka an hman a ni a. Kum AD 40 hnulama Paula hunlai pawh hian chu Greek philosophy chuan Juda leh a awptu Rome mite khan Greek tawng an hman tam zawk avangin a hunlai mite hriatthiam awlsam nan Greek tawnga Bible an leh emaw, an sawichhawng anih chuan Greek philosophy hi an sawi tel a ngaihlo theihlo thin a ni. Mahse Hebrai atanga Greek tawnga Bible an lehlin khan Greek apic virus nasa takin Bible hian a kai tih erawh hriat a tha a. Chu chu he zirtirna diklo leh a virus kai chu hei hian a rawn pholang ta a nih hi.

Tin, he thlarau hi mihring/taksa ah a awm tlat avangin mihring chu ramsa aiin chungnung nihna alo neih phah ta nite pawn kan inzirtir fo a. Chupawh chu achunga kan sawi tak angin a diklo leh bawk a ni. Adang leh ah chuan mihring/taksa hian thlarau a neih bik avangin ramsa dang lakah chungnung filawr bik ang pawn zirtirna a awmleh bawk. Bible erawh chuan ramsa te pawn thlarau an neih thu min hrilh a, tin, hnar atanga ‘thaw’ ve vek annih avangin ‘thaw/thlarau’ neih bik avanga mihring hi chungnung bik fal kan ni tih hi chu tanchhan tlinglo leh beitham tak a ni(Thuhriltu 3:19-21). Hetiang zawnga thil siam zingah chungnung ber kan nihna kan haichhuak duh anih ro ro chuan ‘anpui(basa- lem/image)’ ang zawnga siam kan nihna te pawh hi tanchhan tling leh roh deuh zawk chu anih hmel daih zawk a ni. Chutiang ni lova 3D picture anga thlarau kan suangtuah chhung chuan mihring leh ramsa danglamna hi thlarau vang ani kan ti fo a nga, thil diklo kan sawi reng mai alo ni dawn a ni!

THIH HNUAH THLARAU KHAWNGE A AWM

Sawi tawh angin kan zirtirna dawn thin nen a inmilhloh avangin minung chu a thih veleh khawvel hmuntin mai ah a kal a. A tihthaih theih ho a hran khum a, thenkhatah phei chuan mite a that a, an au a, an tap a, an rak vak vak ni ten kan ring thum mai. A thenlahin vanram leh meidil anlo han fang titih bawk a. Mak tak chu Isua ngeiin “ka awmna ah inkal ve thei lovang” a tih mawlh mawlh pawn vanram chu van ah te han hmuin siam zawh diam tawh ten an han hmu a. An taksa lah chu khum chunga mite tah luih luihin an hmu bawk. Heng mite hi kan va counter(hnial e) tihna lam ani lova, ‘I THI lo’ tih avanga va hnial chiam chilah a ni heklo. Patling meuhvin ‘ka thi a lawm’ a tih chuan an thi chu ani miau hek ang chu le an ngaihdan ah chuan. Mahse Bible-in a ti em? Bible-nen a inmilh em? Tih kan va tehkhin ve thung erawh chuan “mitthi te chuan hriatrengna an nei tawh lo’ a ti kiau mai si a! Chutichunga patling meuhvin marphu pawh awm tawhlo, thi a, amah leh amah pawh khumah inhmu a, a mah lainata tah tute pawh hmu a, midangin an hmuh ve theih si lova awm daiha a inhriat tlat chuan HRIATRENGNA chu ala nei chiang a. A ngaihtuahna leh rilru pawh ala bo lo tihna ani zawk! Engvang maw? Bible hian chiang takin a sawi tlat a lawm le? Bible-kan ring a, kan tanngam tak tak anih chuan hetianga mitthi ni a inchhalte hi dik tak zawk ah chuan a thi hauh lo tihna a ni! Hetianga ngaihtuahna anlo nei a zeldinna anlo neih mai theih dan hi an ngaihtuahna kal buai emaw pawh a ni thei, chu erawh kan hre chhunzawm lo, Bible hian tanchhan min pe bawk si lova, guess work ni mai teh se.

Awle, Bible chuan tihian mi an thih chuan min hrilh a, “vaivut(mihring/taksa sawina) chu a awm angin lei ah a kir leh a, thlarau chu a petu Pathian hnenah a kir leh thin(Thuhriltu 12:7)’ tiin. Kan thih chuan kan taksa chu leiah a kir leh a, vaivut ah a chang leh mai a. Tin, kan thaw(thlarau sawina ni bawk) pawh chu Pathian min pek leh kan hman hawh anih avangin kan thih veleh Pathian hnenah a letleh nghal mai a ni. Khawvel ah hian la cham a, vak vel ruai ruai tur hian Bible hian min hrilh hauhlo. Mizo Bible lehlin sual ti ila a sual lo ang chu maw, thih veleh thlarau chu hremhmuna kal a, kang nghal tura kan suangtuahna hi a ni!  Hremhmun tia a kan sawi hi English Bible lehlin thar ah chuan hades(Greek) tih a ni a, Hades tih thumal hi septugiant a Hebrai tawng Sheol(Thlan) tih thumal lehlinnana an hman khan Greek epic virus a kai phah a, Haides chu Greek Titans ho thawnthu hria te chuan in hriat vek kha; Zeus a unaupa a ni a, zeus nen an intibuai a, hrem a ni a, underworld(lei hnuai) ah a khung a, leihnuai a mitthi khaw Lalpa alo ni ve ta tih a nih kha. Kha khan haides thumal hi a ti hnawk ta em em mai a ni.  Hemi avang hian sheol/hades chu mei alh dur dur tura ngaihruat theih tak pawh ani a, mahse chu chu Bible min hrilh dan a ni lo! Tirhkohtethiltih 2:31 ah chuan Yeshua chu Hades  ah hnutchhiah a nihloh thu  sawi lan a ni a, hades ah a kal tihna a nih chu. Paula chuan Yeshua chu Hades ata  nithum ni  ah kaihthawh a nih thu a sawi ve leh bawk a(1Korinth  15: 3,4). Mizo leh sap thenkhat hote pawn hmasang atang tawha kanlo inzirtir dan a nih miau tawh avangin Hades chu hremhmun, kang hluah hluah tur emaw tih mai a awl. Mahse Paula vek hian Hades chu kangthei(burnable) lam nilovin  thlan  a ni tih chiang takin arawn pholang ta a ni! Tichuan Yeshua pawh kha nithum chhung thlana phum a ni tihna a ni a. Hremhmunah a kal tihna lam a nilo! A tihfiahtu atan Joba chuan “Sheol ah chuan mi thukru teh la” a ti bawk a. Joba’n hrehawm taka natna a tuar hnua sheol a humhim a duh dan ah hian a hrehawmloh ang tih a hriat mai a; thlan a ni ngei ang tih hi a rin theih nghal a ni.

Tichuan a huhova thawhlehna ni ah chuan Pathian thaw vek chu alo kirleh ang a, sheol vaivut ah chuan rawn lutin keimahni hi minung kanlo ni leh mai dawn a ni. Chu minung taksa ngei chu rorel sak tur leh vanram kal tur chu a ni bawk. Bible- hian chiang takin misual te pawh thawhlehna ni ah rorelsaka awmin Gehennah meidil ah hrem annih tur thu min hrilh bawk(Thupuan 21:8). Hremhmun meidil(Gehenna) hi King James Version  ah chiang takin a inziak a(Matthai 5:22, marka 9:47), heibak ah hian Greek Bible ah chuan vawi 31 lai a lang bawk; a kawh ber chu Hinnom ruam, Jeruslem pawn ami  sawina a ni a.  Smith’s Dictionary of the Bible  chuan Hinnom ruam chu hnawmhnawk leh misual, thilsualtitu te halralna  hmun a ni a ti a. Daniala 12:2 ah chuan “mitthi tawh te chu anlo thangharh leh ang a, thenkhat chatuan nunna ah, thenkhat zahna leh chatuan hremna ah” a ti nghe nghe a ni.

Tin, he thawhlehna taksa atang hian meidil a kang(burn) thei kan nih zia kan va hmuhfiah rual rualin thlarau ringawt chu mei a han kan ngaihna a awmloh tur zia hi a langfiah ta uar mai a nih chu; mei chu carbondioxide leh oxygen, hydrogen kang a ni miau mai si a, chutah chuan THAW/BORUAK/THLARAU hi kang leh tur chuang reng reng a awm hauh lova, energy a produce(siamchhuak) deih a ni, kan man thiam em!  Chutiang bawkin vanram lama kal turte taksa chu Evan. Paula ten ‘Sin thuah chakin’ alo tih fo nachhan leh ‘lei taksa a dang a, van taksa a dang’ a han tih atang te hian kan taksa hmasa vaivut atanga siam- damlo thei, na thei, thi thei ang ngawt kha chu anih tawh hmel lova, a turu ang tih te mai hian a ropui tur zia hi sawi mai teh ang, a turu tawh dawn a ni e!!


CHATUANA KANG TUR KAN NI EM

Chunglama sawi tak angin thlarau hi medil ah a kal dawn lova; taksa leh thlarau inbelbawmin minung- tuna nangmah, keimah, ngaihtuahna leh rilru nei, duhna hmuna kal thei, tawng thei leh na hria a tap thei ngei hi meidil rap tur chu a ni. Chu chu kan manfiah thiam pawn a rinawm a, mahse chumi phena thu diklo, hlauhna hmanga Pathian hnung inzuitirna chu Chatuana kang tur kan ni tih theory  hi a ni. Hei hi bumna, Bible tum dan nilo a ni. A hrim hrimin meidil a chatuana kang tura inzirtirna hi Pathian nihna leh dikna JUSTICE kalh a ni; ngatimaw – Minungte  ngaihdan pawh ngaichang lova Eden huana a chhia leh a tha hriatna thing dah hi Pathian dik zia lantirna a ni em- Nilo! Anih chuan Setana avanga sual kai minungte chatuan medila kan tlawk tlawk tir hi Pathian dik zia lantirna a ni bawk em- nilo deuh deuh! Anihleh Pathian leh mifel te kianga Setana leh misualte chatuana anlo awm ve reng hi Bible min zirtir a ni em – nilo chiang bal! Bible chuan Sual haw ngawih ngawih tur leh do turin min ti zawk a ni.

Anih chuan Bible-in ‘chatuan’ a tih hi kan hnawl dawn ta em ni? Nilo ve. Entirna mawl tak han siam lawk teh ang; Mount. Everage leh Millenium centre kan sawi rik apianga sawi rikloh theihloh chu an san(height) zawng hi a ni. Feet eng anga sang pawhin insan hleih nimahse an pahniha thumal inang kan hman ve ve theih chu  Sang tih thumal hi a ni. “Sang” tih thumal hmang ve ve chung hian an insan hleih zawng chu feet sangchuang daih ani tih kan hre mai thin bawk. Hetiang chiah hian chatuan tih thumal value(hlutna) pawh hi Bible tum danah a innghat. Entirnan, Tura Lal sunna hla ah chuan Pathian thilsiam zawng zawng zing ata Setana chu awmleh ngai tawhlo tura tihboral vang vang a nih tur thu sawi a ni(Ezekiel 28:19; Hebrai 2:14). Hetiang ang hunah hi chuan Chatuan tih thumal hlutna(value) chu- Setana chu Pathian thilsiam zing ata awmleh tawh ngailo tura a boral hma chu meidil a kang char char tur tihna a ni a; boral pawh nichuanglo, Pathian thilsiam te zinga awm tawh miahlo tur pawh nichuang lova a sir meidila lo kang ve char char tur tihlam a kawk lo a ni. Hetiang chiah hian Sodom leh Gomora chungchang pawh meihlawmin chatuana kang turin sawi anih kha(Juda 1:7). Tunah chuan Sodom leh Gomora pawh a awm tawh lova, tin, mei hlawm lah a sur tawh lova, eng kang mah a awm tawh hek lo. A awmzia kanva hmuhfiah tak em em chu meiin Sodom leh Gomora a kanral hma chu tawp lovin a kang char char dawn tihna a ni.

Awle, Bible-in misual te pawh meidil ah ‘tihboral’ an nih tur thu min hrilh ve bawk(Sam 145:20; 92:7; 1Thesolonika 1:9-10; Thufing 2:22; 2Petera 3:10; 1 Johana 3:8). Mi tam takin intihthaihna atan taka tawp chin neilova rum leh na ti tlawk tlawka chatuana kang vel tur chuan min hrilh hauh lova. Nangmah, keimah - na hria, tap thei leh hlim thei ngei hi meidil ah chuan hrehawm titaka kangral  vek tur chu alo nita tihna a ni! Tawp chin nei lova kanral te chu a pawilo deih zawk a lawm kan ti em? Tam tak chuan an ti! Hnu hma leh hniak nei map lova tawp hmak hi ani lawmni ZAHNA dik tak chu. Kan khawvel damchhung ni ah pawh hian a chiang tiru. Meidil sa leh hrehawm luat avanga hriatna leh rilru fim a rawn nun leh ni phei chuan zahna zawng zawng alo infuankhawm dan tur leh awm tawh miahlo tura han tawp hmak mai pawi zia chu experience a hriat chi a ni ber e.

TLIPNA

Zirtirna  mawlmang takah chuan  mihring/taksa  chuan amah ah thlarau neiin thlarau bawhchhe ve thei neih tir hi thil pawi tawp a ni a; taksa  tihsual  tinrengin  mihring thlarau a tihbuai phak rinna hi zirtirna bawlhhlawh a ni leh bawk! Hei mai  nilo minung  bawhchhiatna chu  minung thlarau bawhchhiatna a puh hi zirtirna kalh a ni bawh a, Pathian bawhchhiatna a puh nen thuhmun reng a  ni!

Mihringah hian thlarau chu a awm ngei a; chu chu mihring thlarau tih a sawi mai thin pawh a ni. Mahse a nihna takah chuan Pathian thlarau zawk a ni a; Pathian atanga energy kan dawn ti ila a fiah ber ang chu maw! Chu chu Pathian thlarau nunna atana kan hawh zawk a ni bawk a!! He energy hi nunna atana hman a nih avangin animal kingdom hian kan nei vek a; rul, mihring, misual, mifel, dragon, engpawh mai hian nunna atan an hmang vek a ni. Chung zawng zawng chuan an thih ve leh an energy chu Pathian hnenah an pe kir leh vek tih hi thudik leh Bible zirtirna him ber a ni a. Minung hian amah atanga chhuak leh siam  thlarau a nei reng reng lo a, pek anih miau avangin Bible hian “mihring thlarau” tiin a sawi mai zawk a ni. Mahse a bulthut zawk takah chuan Minung hian thlarau nghet tak  a nei lova, nunna atan Pathian thaw kan hawh mai zawk a ni a. Bawhchhiahna leh sualna tinreng mai lo khum tir a, chuta tanga sualna zawng zawng lo chhuak a, meidil hial lova pan tir hi Bible ziritrna kalh leh Setana thilthuk inthup a ni” tih hi a ni!!! Tin, Pathian khawngaihna leh thiltihtheihna avanga thaw thei, ngaihtuahna fim leh rilru dik nei theia kan awm hi a lawmawm em em a. Chumaibakah kum tam tak chhung kan lo inzirtir thin thihhnu piaha thlarau nunga la intawngtaipui theih tih thu kha alo dikloh zia leh Setana bumna anih zia kan hre ta a. Tichuan mihring tan vawikhat chauh thihna hi ruat ani angin vawikhat chauh nunna kan nei bawk a, chumi chhung chuan kan duhthlanna hmangin Pathian kan zawn a, kan pan a, a thlarauthianghlim dila chan  hi kanlo mamawh tak meuh meuh a ni.