Women Seed(Hmeichhe thlah) Vs Serpent Seed(Rul thlah)

Topic hmasa lamah nasa takin Genesis sualna hi Sex vang alo nih theih zia leh tun thlenga mihring fate chunga chu sualna chuan hnuhma ala neih zel avangin ‘natna’ alo nih theih zawk zia kan sawi tawh a. Mihring fate hian duh avanga sual sim ngawt te alo theihloh zia leh tumah reng hi he natna lak ata kan him bik loh zia sawi lan ani tawh bawk. Abikin kan taksa chhungah hian min thunun theih nan DNA code an hriat fai vek tawh avangin Paula ten anlo sawi fo tawh angin kan duh vang pawh nilo, kan chak vang pawh nilovin sual kan ti a, kan khawih a, a chiang a ni; chu chu kan DNA ah hian a awm vek tawh a. Thawk khat lek pawh thlarauthianghlim tello chuan nunna hi alo ramhuai em em vek mai a ni tih pawh kan hria.

He topic ah ve thung chuan Genesis bung 3  a thlah(seed) chungchang te, chumi atanga hnambo kanlo nih zia leh Rul thlah ho chhandamna kawng inhawn dan sawilan ani ve thung dawn a. Hei hi thenkhat tan chuan pawimawhna a awmlo angin a hriat a. Tin, tunlai theology kan hriatlar loh zawng tak ani bawk a, rinloh mai pawh a awl rum rum ang. Mahse Bible kan en chuan hun hnuhnung ah hriatna te lopung a, thudik haichhuah ani dawn tih kan hre si a. Chubakah Bible prophecy reng reng hi hunbi tuk leh ruat vek anni a, chumi hma chuan mifing ber leh rau ber tan pawh hriat phak ani lova; tin, Yeshua(Isua) lo pian tur phei kha chu hmuchakin Zawlnei tam tak anlo awm tawh a,  Sumeona chuan a hmuh tak bik avangin ‘I bawi hi thlamuang takin i kal tir dawn ta a…’ ti hialin a vanneih thu a chhamchhuak hial a nih kha. Tin, Lal Salomona chuan, “Engkim tan hian hun ruat a awm a, van hnuaia thiltih zawng zawng tan hun ruat a awm; ..Ngawih hun a awm a, sawi hun a awm…” tiin alo puang lawk diam anih kha. Chuvangin hmasang kum BCE 3000 liam tawha hrilhlawkna tam tak leh hriatfiah theihloh thu ziak te kha kum zabi 1 ah te alo inhawng tan chauh va, chutiang zelin hun leh hmun ruat a awm a, chumi hmachuan engmah hi pawimawh tawp, thihna leh nunna thu pawh nise sawi chhuah khap tlat thin te anni thin. Tun hun ah pawh hian hun hnuhnung Daniela hapta tawpna kan hmang mek a, thil thup te puan alo hun a, thil harsa hriatfiah ngailoh te hriatfiah alo ni tan ta a nih hi!

RUL THILTIH MAK LEH TENAWM

Genesis 3:15 "Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la tithitling ang a, nangin a ke artui i la tithitling ang.”

He chang hi chik takin han en ila, thil mak tak mai a awm! Genesis thu chu kan hriat vek angin Rulin Evi thlemna hmangin thei a ei tir a, chumi hnu chuan mipa in a ei ve ta, tih a ni. Topic hmasa lam ah chuan a phenah hian Inngaihna tenawm tak Sex a awm theih zia kan sawi tawh kha. Chumi dik theihna lai chu he chang vek hian a rawn pholang leh a. Mahse chutiang zawnga tanchhan zawng leh um kan tum a ni lova, Bible hian a phal hek lo. Bible chhunga thudik erawh haichhuah kan tum dawn thung a, chu chu Pathian lawmzawng leh a thlarau pawlna pawh a ni reng a ni. Tichuan hemi chang a lang chiang, zawhna awm chu enge le? ‘Thlah(seed)’ tih thumal hi a ni. Ni e, Eden tlukna hi “Thei ei vang a lawm” titu te tan chuan thei ei avang hian Gene, DNA leh Chromosomes te avanga lo awm thin ‘thlah(seed)’ hi engtinmah a awm thei ngai lova, sawi tawh angin Yeshua ngeiin “ka a lutin mihring a tibawlhhlawh lo” a tih ngei kha maw! Chuvangin “thlah(seed)” chungchang kan hriat chuan sex intercourse (mipat hmeichhiat hmanna) a awm thin tih kan hre mai, chu chu Biological life a nunna nei kingdom zawng zawng hian kan kal dan vek thin anih vang a ni!

Tin, khi changa khian “thlah(seed)” chi hnih an awm thu sawi lan ani bawk a, chu chu Rul thlah(serpent seed) leh Hmeichhe thlah(women seed) a ni. Tichuan topic hmasa lama kan sawi tak kha kan va ngaihtuah kir leh chuan Rul hian thlah(seed) alo neih theih zia kan hre mai ang a, chu Rul chu tunlai rul ang anihloh zia – a lu chu rul , a nghawng hnuailam mihring pianhmang ang alo nih theih dan pawh kan

hriat vek tawh kha.

Genesis 3:13 ah chuan  “Engthil nge I TIH tak” tiin Pathianin Rul hi a hau bawk. He chang hi tawngbul lam kan va en chuan “TIH” lai hi English Bible chuan “Done” tiin a letling a, chu chu “Action” tihna a ni. Tin, Hebrew Strong#6213 ah ‘PIEL’ tih a ni bawk a, chu chu "to produce" emaw "To press immodestly the breasts of a woman" tihna a ni kher kher a, chubakah Genesius definition- pawn "sexual commotation" a pe bawk. A Greek leh Latin tawnga lehlinah te pawn “facere, perficere, conficere mulierem, euphemism for sexual intercource” tih a ni bawk(Fesselii Advers. Sacra,lib. ii.cap.23.). A awmzia chu  II Kor 11:3 a "Nimahsela, rul chuan a ngamthlemnain Evi a bum ang khan"  tih nen kan va enmilh chuan Evi hi thlemna satliah ringawt chuan Rul hian a thlem lova, “mipat hmeichhiatna lam thiltih” engemaw chu a nei ngei a ni tih a tifiah.

Tichuan Evi hian Rul chi atang thlah(seed) alo neih theih dan chu kan man tawh em? Thil engemaw tak a ti a, tawngka mai chu alo ni hauh lova, mitchakna leh tisa chakna lam a nih chu. Tunge Rul chi atanga fa lopiang chu ni ta ang le? Chu ngei chu Genesis 4:1 ah “Tin, Adama chuan a nupui Evi chu a pâwl a; tichuan a rai a, Kaina a hring a, “LALPA tanpuiin mipa ka lo nei ta” a ti a nih kha. He chang hi Aramaic Targum lam ah chuan “LALPA” aiah hian “SAMMAEL” tiin a awm thung; “SAMMA” chu “Tur(Poison)” tihna a ni a, ‘EL’ chu “Pathian(God)” tihna a ni. Tichuan Evi fa hmasa ber Kaina chu “Tur Pathian” hmangin a nei tihna a ni. Zawhna a awm leh ta! Engvang nge Bible inziak awmlai aiah Aramaic Targum ziak kan hman? Ni e, Dead Sea Scroll ziak puka an hmuhchhuah tum khan Genesis 4:1 ziak abo tak tlat dan hian rinhlel a tizual em em a tin a ni! Setana hian Thudik haichhuah hi a hlauh em em avangin Yeshua ngei pawhin “Lehkhaziaktu te lakah fimkhur rawh u” tiin min zirtir hial a nih kha! Chubakah YHWH Pathian hming a tihdazat tum dan te, Elohim bumna avanga thurin hran tam zia te, a tam mai sawi sen a nilo.  Evi fa hmasa chu Kaina a ni a, Sammael(Tur Pathian) lak atanga a fa a ni a. Tin, a pahnihna atan Abela a hring leh a, chu chu Adama lak atanga a fa a ni thung. Bible ah pawn kan hmu a, Adama thlah te zingah Kaina hi chhiar tel a ni ngailo hrim hrim reng a ni.

THLAH(SEED) PAHNIH INDONA

Genesis 3:15 "Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la tithitling ang a, nangin a ke artui i la tithitling ang.”

Tichuan thlah(seed) chi hnih lo piangchhuak chu Rul thlah leh Hmeichhe thlah anlo ni ta a. Rul thlah chu Kaina line atang arawn thang duang a, tin, Hmeichhe thlah pawh Abela atangin a rawn thang chhoh ve bawk ang(kan hmu, kan hria). Mahse Kaina khan Abela a that tih kan hria a. Indona chu tan a ni ta. Pathian hian heng thlah pahnih inkar hi alo sawi lawk dim diam a, chu chu INDONA a ni. Tichuan a hmasa ber atan Kaina chuan Abela a that a nih kha. Awle, he indona hi Yeshua leh Setana indona ani tih kan manfiah a ngai. A pawng apuia “Indona chu Lalpa indona a ni” lo tih ve ngawt chi a ni lo. Hmeichhe thlah chu kan hria a, Israel an ni. Rul thlah pawh kan hria a, Israel do tute an ni.

Kir leh ang, Pathian sawi lawk indona chu tan alo ni ta a. Kaina leh Abela. Kainan Abela a thah tak avangin a aiawh tur Setha alo piang leh a. Kaina line chu khawchhak ah an pem a an inthlahpung ta a nih kha. Tichuan kum 1000 alo vei a. Nova hun alo thleng ta. He tih hunlai hian Kaina line bakah Vantirhkoh tlu ten khawvel ah an mahni nihna pawm lovin mihring fate ngaiin chi te an thlah ta anih kha; hetah hian Kaina line leh  leh Vantirhkohtlu tangrual chuan Pathian thuawi Setha line chu an han inneih pawlh tak tak mai a le…. Pathian huat zawng alo thleng ta, Pathian  mite chu Rul thlah ten an chimral ta mai dawn a, chutah chuan Pathianin lohtheihlovin mihringte chu a thah chimih alo tul ta( Genesis 6:7 “Ka mihring siam hi lei chung ata ka tiboral the mai ang”). Adama thisen kai Nova te chhungkua chauhlo chu leichung ata mihring leh Vantirhkohtlute thlah Nefellim te chu tihboral vek anlo ni ta a ni.

Tuiletah khan Kaina line chu an thi vek em? Nova chu Setha line a ni si a? A fapa te pawh Setha line tho. Mahse midang 4 chhui tur an la awm e, Nova nupui leh a monu 3 te. Heng hmeichhe 4 te hi Setha line an nih leh nih loh a chiang ta der lo mai le. Tuilet hmaa thilthleng chu Pathian fapate leh mihring fanute an inneih pawlhna leh inpawl kha Gen 6:2 ah leh 6:4 ah vawi 2 kan hmu ta tlat mai a ni, Ziah nawn a nih kher kherna chhan hi thil pahnih sawina a nih a rinawm thei ta tlat a ni. Tuilet hnua Novan grep zu a rui a, a saruakna leh a tupa Kanaana anchhe dawn kha kan chinfel tur chu a ni ta a ni. Nova sarauk hmutu kha a fapa(hametic hnam tobul) a ni a, mahse a hmutu ni lo, a hmutu fapa Kanaana chungah anchhia a tla daih thung. A mak in ti ve thin em? Thil inthup kan haichhuah a ngai ta a ni. Tah hian Theory tamtak a rawn chhuak ta a, sawi vek lo mai ila, engpawh nise, Nova nupui emaw, Cusha nu(Ham nupui emaw hi Kaina line an nih a rinawm ta ber a ni. Tuilet hlim a la ni a, chhungkaw pakhat chiah an dam khawchhuak a, unau an inneih pawlh lo thei lo tih hre bawk ila. Cush-a nupui Semiramis a rawn langsar leh ta nawlh mai le. A hmelthat thu chu kan sawi tawh kha. An fapa Nimrod-a atang hian khawvel ah serpent seed chu a rawn taidarh ta chum chum mai dawn ta a ni.

BABULON THURUK

Awle, Babulon thruk chu Nimrod atang hian alo intan ta a nih chu. Chu chu kan hria a, a history lam pawh kei ai aia hria innimahna. Nimrod chuan anu Semiramis chu arukin nupui ah a nei a, fa an nei a, chu chu Tamuz a ni. Mipui chuan mak an ti hle a,  an sawidan chuan a pasal Cusha taksa an chandarh a a serh chu a zawng leh a, NI pathian in min rai a ti a, chu chu mipuiin an rin nan, a dik chuan an zan mutna ah an khum lu ah thleng dawh se, rangkachak a lo awm mai ang tiin an sawi a, chu chu December 24 zan hi a ni e an tih chu a ni. Ni 25 ah hian a fapa Tammuz a hi a hring bawk a, chrismass kan hman thin hi a ni. Tin, Sunday serh alo nih tan dan leh chhan pawh hi he NI pathian Cusha hriatrengna atanga lochhuak a ni bawk. Semiramis chuan a pasal a thih hnu chuan lalna chu a pum hmawm ta a, hetah hian a sipai te chu a duh duh a lamtang a siam nan a mutpui ta vak vak mai thin tiin an sawi leh bawk. Uruk khaw lal Gilgamesh pawh mutpui a alamtang a siam a tum a, mahse Gilgamesh hian a thah ve mai a hlauh avangin a hnial niin an sawi bawk. Helai thilthleng hi dang lam deuh hret hret in khawvel hmundang ah a darh ve zel a, Egyptian pathiante ah pawh he mi hlimthla hi a lo lang ta chiah bawk a ni. Legend ah chuan Egytian pathian Osiris(Nimrod) chu a unau Seth chuan a that a, a taksa zawng zawng a chandarh vek a, nile lui ah a paih a, Isis(Semiramis) chuan a zawngkhawm leh a, a tawp ah a serh a hmuh chuan a inrai tir ta a, Horus hi a lo piang ta niin an sawi ta chiah a ni.

Horus chuan a pa Osiris phuba chu Seth-a lak ah lak a tum ta a, an indo a, Seth chu chi thlah theilo in a siam a, Seth thung chuan Horus chu a mit a kherchhuah sak thung a, chu chu eye of Horus, ‘the all seeing eye’ thawnthu lo chhuahna chu a ni. Pawi  ta em em mai chu, he pagan gods te thawnthu hi an hming thlak kual in kan kristianna ah a bo a bang awm manglovin sengluh a lo ni chho ta a, chu chu Pathian pawi sawina a ni a, keini'n chu chu kan hre silo hi a ni e. He hunlai a an chindan pakhat chu Sex orgy an hmang thin a, chutah chuan thingkung an cheimawi chiam thin a, chu zan ah chuan mipa in an man/pawh fuh fuh hmeichhia chu an mutpui mai thin, chu chu a lokal zel a, christmas tree leh mistletoe nen hian inkungkaihna thui tak an la nei an ti bawk. Mizo Hnam sakhua te pawn 'daptawraw' an la neih thin ang hi a ni mahna.. :). Bible ve thung chuan, “Aw, Israel chhûngte u, in hnêna LALPA thu sawi hi ngaithla rawh u,  LALPA chuan heti hian a ti:Hnamte awm dan zir suh la, Vana chhinchhiahnate vangin zam hek suh u; Mite dante chu engmah lo mai a ni si a, Ramhnuaiah thing an kit a, Hreipuia mi themthiam kutin an chei a, Tangkarua leh rangkachakin an chei a,A chet loh nân thirkilhna leh tubohvin an kilh a( Jer 10:1-4)” a ti thung. Kan chinthan lo tenawm zia hi a hniak tam lam tih ngawt zawh chi alo nilo. Bible vek chuan, “Tupawhin thil a tihsuala tih loh tura LALPAN thu a pêkte a enga pawh a tih chuan, hre lo mah sela thiam loh a chang reng reng ang a, a khawlohna mawh chu a phur ang(Lev 5:17)” a ti si a, kan finloh rah tel tur kan ni e. Hei vang hian a lawm, kan chinthan atanga harsatna zawng zawng phurin kan chhuah tak hnek hnek mai chu!! Hei lo pawh hi history tam tak a awm, sawi vek sen pawh ani rih si lova, hei zawng hi duh tawk rih mai teh ang.

ABRAHAM THLAH- SETHA LINE

A hmasa lamah kan sawi tawh a, Nova tuilet ah khan serpent seed chu an ralloh zia leh khawvel ah anlo darh tak chiam dan te, khawvel sakhaw diklo tobul lo chhuahna anih zia pawh kan sawi lang tawh bawk. Kan hriatsa history tlem sawi lang lawk teh ang, BCE 2091 hunlai khawvela awm zawng zawng chu Nova chhungkua atang khan thisen lamah Kaina line thisen kanlo kai ta vek mai, pawi tak a ni. Mahse hetah hian “Rinna” lo pawimawh zia kan va hmuchhuak daih thung a nih chu. Chu chu Abrahaama, Tera fapa kha a ni. Setha line, Kaina line thisen kai a ni a. A pa Tera ngei pawh milem pathian siamtu leh betu ngei ngei a ni a. Mahse chumi kara Pathianin Abrahaama a kohchhuah chhan hi kan hre thei em? Abrahaama chanchin kan hria a, chutah chuan apa Tera milem pathiam siam te chu ring lovin a vaw chhe vek a, pathian annih pawh a ringlo a nih kha. Awle, chu rilru chiah chu a lawm Pathianin a duh em em chu. A rilru a danglam bik zia kha turu tak a ni. Tichuan Pathianin a awmna lam ata Kanaan ram ramtiam kan hringnun hlimthla tur chu pan turin rinnain a kohchhuak a, thuthlung hial a siam sak a nih kha.

Tichuan hun alokal zel a, Abrahaama thlah atang Jakoba alo chhuak a, tumkhat chu Pathian vantirhkoh nen inbuanin a kumkuruh a tihtliah saka. Chu vantirhkoh chuan mission ropui tak mai Jakoba chu a hlan nghe nghe a, chu chu Yisrael(Israel) tiin a hming a thlak sak ta a nih kha. Kan hriat vek angin Yisrael hmingphuah reng reng hi mizo te anga hming inphuah satliah ani ngai lova, chhan leh vang, tihtur leh hmabak engkim mai an hming hian a keng kim vek a ni. Tiang chiah hian Jakoba hming thar chu Yisrael tih a ni a. Yisraela chuan fa 12 a nei a; Reubena, Simeona, Levia, Juda, Zebulun, Issachar, Dan, Gad, Asher, Naphtali, Joseph leh  Benjamin te an ni a, anni ho hi Yisrael tih te chu an ni. Hetah hian kan chik tur chu Josepha hi a ni. Tichuan BCE 1800 bawr ah Joseph chu a unau ten phiar ru in Aigupa sumdawng ho sal ah an hralh a nih kha. Nimahsela BCE 1886 ah Pharoa mumang a hrilhfiah sak avangin Aigupta Governor hial alo ni ta a nih kha. Josepha chuan Aigupata mi Asenathi a nei a, chumi lakah chuan fa pahnih – Manasea leh Ephraima a nei bawk a. Chung Josepha fa pahnih te tel chuan Yisrael tih anlo ni ta a ni.

Heta tang hian Yisrael sal tanna khawvel chu a intan dawn ta. Chu chu tuarna satliah ani hauhlo, khawvel pum pui hnamte chhandamna alo nih reng dan hi a mak a sin!!! Khawvela hnam, sakhua leh culture & tradition pakhat mah hi kum 2000 chhung he khawvela um kual, cheksawlh, tihduhdah, thah burh burh an nih hnuah pure(fir) takin an la rawn ding chhuak leh thei lo hrim hrim, chuti a nih laia Yisrael a rawn ding chang reng hi engemaw inngaihtuah ve em? Chu chu Pathian thil tih a ni chiang, kan pawm vekin ka ring, mahse chu chu enga tinge kan ralkhat uipui tui lian thlir voh voh rik ngawt? Enga tinge keini hnam kum 100 lek chhunga hnam X ray kha kan boral mai dawn dawn ti tih bik? Enga tinge chu Yisrael-te chakna thuruk chu kan hnamah kan chhawm ve mai loh?? A chhanna in hria em?

He Juda Institution leh a system hi Isua khan a rawn enchhin a, a tha tawk a ti a, chu institution-ah chuan khawvel hi hruai luh a tum ta a, chu chu Setana chuan a ngai ngam lo a, Judaism phenah Jentailism, Dan(Torah) aiah Khawngaihna(Grace) , Torah v Pauline Theology, Thiltih aiah rinna-in a rawn cholet ta rup rup mai a, chutichuan chu olive thinga a tak zawm tur chu zawm ta lo chuan Olive suak Constantine-an a rawn zawm ta daih mai thung a dawn anih kha, ava ver vek thlak inti em?!

Chu Judaism chu Pathianin a rintlak dawn em tiin kum 2700 chhung tihduhdahna hmangin a enchhin leh ta a, fiah a dawl tlat mai a ni, Jentail ten kum 2000 an rahbeh hnuah, chu hnam leh chu institution chu a la rawn tho chhuak leh thei tlat mai! Mizo theologian ten Judaism hmusit tur hian eng nge kan nih chiah, zah nachang kan hre lo hi a zahthlak zawk, kum 4000 dam khaw chhuak thei institution hi kum 100-a dazat zo takngial tawh hnam hian a ZAH TUR ani ringawt zawk a sin ni, sakhuna tur (poison) hian kan mit hi tidel teh suh se, thih leh dam kan sawi a nih hi!!

JENTAIL THURUK

Mak tak chu Bible-in Jentail leh Yisrael(Juda) a sawi hrang hi a ni. Kan hria, kan pastor leh theologian hote ngei pawn Jentail chu Juda(Yisrael) hnam nilo zawng zawng sawina niin an sawi a, kan inzir thin bawk thin. Tin, Yeshua ngei pawh Jentail tana rawn kal bik leh ami Yisrael te mittidel rih niin an sawi thin a ni.

Nimahsela Bible ah kan hmu a, BCE 2000 bawr laiin Pathianin Abarahaama hnen ah thuthlung a siam khan, ‘CHI ropui takah ka siam ang che’ a ti anih kha. Heta ‘CHI’ hi Hebrai tawng ah chuan ‘Goyim’ tih a ni a, chu chu ‘Jentail’ tia Latin tawng nen hian thumal thuhmun leh inang a ni. A awmzia chu Abrahaama hi Yisrael thlahtu mai bakah Jentail thlahtu pawh a ni ve tihna a ni a. Nimahsela Greek leh Latin apic virus hian kan Bible hi a tihnawk em em khawp mai a, tun thlengin Yisrael leh Jentail inkarah leikhichat zau tak Kohhranpa te ho khan an bun ruah mai a nih hi.  A mak tiru? Enge diklo a, tunge diklo zawk ta ang?

Kan Bible bih leh ta zawk ila;  Genesis 48:17-19 “Tin, Josefan a pain a kut ding lam Ephraima chhîpa a nghat chu a hmuhin a lung a ni ta lo va; tichuan a pa kut Ephraima chhîp ata chu Manasea chhîpa sawn tûrin a chawi kang a. Tin, Josefan a pa hnênah, “Ka pa, hetiang tûr a ni lo: hei hi asin fa tîr chu ni, i kut dinglam hi a chhîpah nghat zawk rawh,” a ti a. Nimahsela a pa chuan a duh lo va, “Ka hria e, ka fapa, ka hria e: ani pawh hnama sawithamin a awm bawk ang a, ani pawh a ropui bawk ang: amaherawhchu a nau hi a aiin a ropui zâwk ang a, a thlahte pawh chi hrang hrang tam tak mai an lo la ni ang,” a, heta chikleh ngai em em bawk chu “a thlah te pawh CHI hrang tam tak anla ni ang” tih hi a ni. Sawi tawh angin ‘CHI’ chu ‘Goyim’, Latin tawnga ‘Jentail’ tho kha a ni a. Ephraim atangin Jentail mi tam tak anlo chhuak dawn a, Yisraelan  a sawi angin Abrahaama leh Isaaka hming hial Ephraima leh Manasea hian an pu hial bawk a, chumaibakah an thlah te zel thleng pawn chu malsawmna chu an dawng dawn bawk a ni.

Chuan Yisrael history a kim leh tawi thei ang berin chhui ang le, BC 1500 ah Josepha avanga Jakoba chi leh kuang Yisrael miten Aiguptaa an zuk luh khan kum alo vei a, Josepha thih hnu chuan Josepha hrelo Aigupta mite chuan Yisrael mite chu anlo tiduhdah tan ta a. An tihduhdahna chhan hi inhmuhsitna ani ringawt lo, YHWH Pathian nilo an pathian dang an biak ve avangin Pathian humhimna pawn ah an chhuak a, Setanan alo sawisa ta a ni e! Kan hriatreng tur chu hetih hunlai inkar hi kum 90 lai a tla a,  chutiang kum meuh a tlak zep chuan Yisrael miten leh Aigupta mite an inneihpawlh ngei ngei ang tih kha hriat a ngai a ni. Tichuan kum BC 1440 ah Aigupta sal tang te chu Mosia hovin Pathianin a hruaichhuak a, Sinai tlang ah Dan(Torah) a pe a nih kha. Khami tum khan Aigupta ram ata Yisrael thisen kai tam tak an hruaichhuak tel ngei ngei ang tih rin bawk a ngai. Han kan duai ila, BC 721 leh 606 alo nih tak hnu pawh a Yisrael te pawl hniha anlo inthen leh chhan chu Sinai tlanga Dan(Torah) pek bawhchhiatna tho a ni. Hetah hian kan chian tak chu Dan(Torah) bawhchhiatna hi Pathian hian a enliam mai mai lova, keinin tullo leh pawimawhlo ang hiala tunlai kan inzirtirna te hi Pathian hian a ngai zam mai mai lovang! Tichuan Yisrael hnam khat Ephraim chhungkuaa hnam sawm chuan Torah chu an PAIH then a, pakhat zawk Juda chhungkuaa hnam hnih chuan Torah chu an BELH ve thung. Chu chu Pathian pawikhawihna rau rau vah inang mah se PAIH zawk na na chu a case a sang e, chuvangin Assuria Lal Tiglath Pilesar III chuan BC 721 ah sal ah hruaiin an nulate hnam dangte nen a inthlahpawlh tir a, an tlangval te an that a, chung thlah te chu kum zabi 1 –na lai Samari mite kha an ni. Hemi tum chauh nilo tum tam tak sala hruai anni nghe nghe a, chuvangin Yisrael rama an kirleh fo tum pawh hian ramdang mi te anlo inbengbel nasa tawh bawk nghe nghe, chubakah mi tam tak kirlehlo pawh an awm bawk a, a awmzia chu khawvel ah hian Yisrael hnam sawm Ephraim chhungkua chu an darh zo ta a ni e( Jer 50:6; Ezek 34:6; Deu 28:36,37; Isaia 7:8; 2Lalte 17-20). YHWH Pathian chuan an Pathian nih pawh a duhlo ta hial reng a ni, Hosea 1:9 ah chuan, “Tin, YHWH chuan heti hian a ti a: A hmingah Lo-ammia sa rawh: nangni hi kamite an ni si lo va, tin, kei in Pathian ka ni dawn lo” alo ti a, Yisrael thisen kai te, kalbo leh pembo ta te, hmuh phak loh leh an chinchin pawh hriat tawhlo ho tan chuan YHWH Pathian chuan an Pathian nih a phal ta si lova, Pathian nei lovin an vak darh a, tunge annih leh eng hnam nge annih pawh an inhre ngai tawhlo va, an hre ngai tawh bawk hek lo a ni!

Tin, Juda chhungkua pawh sala hruai darh annih hnu kum BC 500 bawra an rama an kirleh khan Yisrael ram hmuntin ah chuan hnam dang mi anlo chengin anlo inbengbel nasa tawh a, chung zinga hriat hlawh zual te chu Edom mite, Idumeans mite an ni. Heng ho ngei hi Yeshuan khawvel alo kal laia, ‘Rul thlah te u’ a tih kha an ni a, serpent seed(Kaina line) te an ni a, Juda te a sawina ani ngai reng reng lo tih hriat a tha. Tin, heng hnam dang lo luah tawh te leh Judate chuan kum alo vei chuan nupa ah te inneihpawlh lehin Temple thlengin an inzui lut ta a nih chu! Chu chu thil pawi tak a ni. A pawi zia chu Sinai Torah nilo, BC 500 hnu lama mihring siamchawp Oral Torah an tih chu alo chhuak ta rup mai, chung ho chu a lam tawiin TALMUD tih a ni. Hei vang hi a nia Paulan Torah(Dan) chu huatthlala leh thil diklo anih zia a sawina chhan te, Yeshua ngei pawn, “Lehkha ziaktute lak ah fimkhur rawh u” a tihna chhan chu a ni bawk. Dan(Written Torah), Sinai tlanga YHWH Pathianin a pek te an ni lova, Rabbi te leh puithiam ho anmahni inchawm lenna leh politics avanga an siam chawp leh belh a ni, kan hria a, sawi tam pawh a ngai awm lo ve. Chu chu tunlai theology hian Juda history leh inchimralna ngaihtuah miah lovin Dan(Written Torah leh Oral Torah) chu thuthlunghlui a ni a, hluihlawn a ni tawh angin kan inzirtir mup mup mai anih zawng hi. Dik tak chuan Sinai tlang Torah(Dan) ngei hi a lawm Rul(Dan bawhchhepa) ngei pawn a rawn bawhchhiat tur chu, hluihlawn nise a bawhchhe hauh lovang!!!!!

Kan man thiam tawh em Yisrael thisen kai Jentail mi nilo tam tur zia chu, Paula ngeiin a sawi a, “Jentail te chu Pathian lova awmin..” alo ti anih kha. Yisrael thisen kai, anpa YHWH Pathian nei si lovin an vak darh ta vek mai a.  Chu aimaha thil ropui chu Yisrael ni si inhre tawh lo te, an thisen kai te, a hnua Jentail tih lo nita, Dan(Torah) leh Thihna hmanga Yisrael(Juda) hnama min lalut hi Pathian ngilneihna leh Setana hnehna ropui tak a ni!

YISRAEL HNAMBO TANLO CHUAN TIRH KA NILO-  MATTHAIA 15:24

A mak tiru! Kum 2000 deuh thaw Jentail tan Yeshua chu rawn kal a, Juda hnam zawng te mittidel rih a kan ngaih thin kha! Theologian tam tak chhui dan pawh ani reng a; Pathian chu Jentail tana rawn piang, Juda hnam paihthla a kohhran rawn din ta ang ten kan ngai thin. Nimahsela Yeshuan ‘kohhran’ a tih leh Latin pa tena ‘kohhran’ an tih lo inanloh zia hi chik dawn chuan tam tak a awm. Kan hmu thiam em, a phena Setana thuruk upa zet mai inthup chu. Chu chu hmu thiam lovin kum 2000 deuh thaw kanlo arkhawthim dai a, Judate kan hmusit a, kan deu a! Dik tak chuan Juda hi hnam satliah ani reng reng hlei nem? Kum sanglal ram(Millenium) atana Pathian buaisaih hnam an ni a, chu chu kum 4000 ngawt Torah(Dan) hmanga insawhnghehna neih pui a ni. Sawi tawh angin Torah(Dan) hi Legal biahthudi hi a ni ngawt lem lo, Juda ten an hmelhriat dan chu ‘Divine Instruction’ tih a ni a, chumi hmang chuan Pathianin kum 4000 deuh thaw zirtirna alo pe tawh a, rintlaka a ngaih avangin Jentail te hi Judaism ah min sawm ve chauh zawk a ni! Kan man em? Thenkhat tan chuan Juda hnam ngaihsanna diklo a ni, hnam feeling , a tih theih. Nimahsela Paula ngeiin Olive thing chu Olive taka zawm tur nisi Olive suak ah zawm kan nih thu a sawi a nih kha. Olive kung chu Jentail an ni a, Olive tak chu Juda(Yeshua chi leh hnam) an ni, Olive suak chu Greek leh Latin sawina a ni thung bawk. Chulo rengah hnam zawng zawng phena Demons(Ramhuai) inchaltauhna(Principality) hi hriatfiah chuan Judaism hnam chauh hi YHWH Pathian thlan leh hnam thianghlim a ni a sin! Tichuan kum BC 1500 hmalama Josepha avanga Jentail(Ephraim leh Manesea) te Yisraela malsawmna dawng tawh chu Kum zabi 2 –na ah Juda pate anlo muthil zawh taka tang khan arawn chiang tan a, Roman, Greek leh Latin kung(Constantine-a, AD 325 Nicea khawmpui kha) ah Jentail chu zawm alo ni ta a ni. Heta tang hian Jentail pa tam takin verse khatlek hmangin zirtirna diklo an kalpui luah luah lo sual zia chu, chu chu Juda pa mumang pawh nei phalo Roman leh Greek pa, Latin pa te khan hre dik ber nih tumin anlo inhnial luih luih a, tualthahna, insuatna, indeusawhna, inpawngsualna leh thlarauthianghlim sawichhiatna nasa tak dik zawk nih tumna avanga DEBATE(a phena ramhuai thuneihna ‘Principality’ awm kha) chuan a hringchhuak ta a nih kha, kan hria a, kan zir thin, mizo tawng ngei pawn Pi Lalsangzualin a ziah kha maw! Bible pum kan en erawh chuan chiang em em in he thuruk hi a lang miau si a, kum khalehchen hre lova kan awm kha a mak tiru dawi at kan nih zia hi! Tin, sawi tawh angin mizo pa in Juda hnam alo hmusit ve rawk te hi a tihtur a nihloh zia leh zak ngawih ngawih tur a nih zia hi a chiang a ni.

Tichuan kum 2000 chhung duh dan dana Yeshua mission kanlo sawngbawl anga Jentail te kohna leh kohhran din tharna anga kan ngaih kha a dikloh zia kan hmu ta. Yeshua ngeiin, “Yisrael hnambo tan lo chuan khawvel ah hian tirh ka nilo” a ti mauh mai. Greek leh Latin pa chawi seilen te tan chuan buai a awl awm tiru, hmuhfiah pawh a har ang, achhan chu Setana theology hmanga chawm seilen ni miau hek le! Tichuan Yeshua lo kalna chhan chu Yisrael hnam bo, Yisrael an ni tih pawh inhre tawhlo rawn seng khawmna chu a ni ta a ni(Kohhran rawn din anga kan ngaih hi chu a mual thelhin a thelh). Tichuan Yisrael nisi, inhrelo te, an thisen kai leh anmahni avanga malsawmna dawng te chu tunge ni ang le?

Awle, kum BC 1000 hmalam ah kir leh lawk ang, Abrahaama chu Jentail thlahtu a ni tih kan hria a. Josepha hunah chung Jentail thlahtu tak tak tur Ephraim leh Manesea chu Jakoba malsawmna ah Yisrael chhungkaw malsawmna a dawng a nih bawk kha. Tichuan kum 4000 deuh thaw Yisrael hnam 12- te chu salah te awmin hnam dang(Kaina line) te tihduhdah na nasa tak an tuar a ni a. Khami chhung khan chi inthlahpawlhna a awm ang tih chu sawi ngai lova rin mai chi a ni bawk. Tichuan Kaina line ah Yisrael thisen kai tam tak khawvel ah anlo awm ta a, engtin maw? Babulon civilization kha entirna atan han sawi thuak ila, Babulon sala Yisrael mite an awm lai khan nupaa inneih pawlhna a awm ngei a, abikin Babulon chu hnam chak annih avangin hnam dang an awp leh an hnaih deuh te lakah inneihpawlhna pawh an nei zel bawk ang tih a rin theih a nih chu. Anih chuan Babulon sal an tan lai ringawt ah pawh Yisrael thisen kai engzata tam nge awm tawh tak ang tun thleng hian! An tam hle dawn a ni, nimahsela chuti taka pure erawh anni tawh lovang tih chu a rinawm a. Chuvangin keini mizote ngei pawh hi Kaina line nge Setha line a Yisrael thisen kanlo kai ve reng zawk a hriatloh a nih chu! Achhan chu khatih lai khan mizo hi Genealogy hmanga kan chhut chuan awm heklo. Kum 100 liam awra lo awm kan nih hmel a, anih chuan Jakoban Ephraim a malsawmna, “hnam tam tak te thlah tu” a tih zing ami kha kan nih hmel a. Chupawh chu lo ni reng se, Yisrael fapa Josepha thisen kai chu kanni a tih theih leh zel, mahse a pure lo vang a, a hla hle tawh thung ang, abikin “Yisrael kan ni” inti ngat tur phei chuan engmah hriat kan nei tawh lova, kan hriatna zawng zawng hi Genealogy hmangin Setanan min thaibo sak vek tawh a nih hi!!!

“Nang olive suak reng ata sah chhum mah, piandan lo anga oliv thing thaah zawma i awm chuan chung a zar taktakte chu, anmahni olive thing pangngaiah chuan zawm an va ni dawn nasa em! Unaute u, he thuruk hi in hriat loh ka duh si lo, chutilochuan in intifing ang; Jentailte famkimna (Ephraim a thlahte sawina) a lo thlen hma chuan Israel mi thenkhatte chungah chawlawlna a lo thleng rih a ni, tih hi; chutichuan Israel mi zawng zawng chhandamin an awm ang. Zion atangin Chhandamtu chu a lo chhuak ang a, Jakoba hnen ata Pathian ngaihsak lohna a tibo vang.”

Tichuan le, Yeshua lokal chhan leh tirh anih chhan chu Yisrael hnambo tan chauh a lokal a ni. Tichuan keinin Jentail tana lokal, Juda(Yisrael) hnam mit tidel emaw paihbo emaw in kan ring ta a. Tichuan kum 2000 chhung Juda leh Jentail chu hnam hrang hlak, lei leh van ang a inhlat ah kan inbirh tluk tluk  ta a. Tin, chhandamna, Yeshua mission chu khawvel mi zawng zawng tan kan ngai ta hmiah mai a!! Nimahsela Yeshua chhandamna chang tur chu tunge tih Bible kan en chuan Yisrael hnambo te an ni tih amah ngei pawn a sawi a. Tunge Yisrael hnambo chu? A chhanna chu Juda hnam 2 chauh nilo hnam 10 te thisen, kum 4000 an saltan laia an thisen lo kai Jentail te an ni. Thil dang a la awm, Jakoba malsawmna dawngtu Ephraim a thlah Jentail te an ni leh bawk. A mak tiru!!! Hei hi Jentail Thuruk, kum 2000 chhung a Setana thilthup a ni. Chuvangin kan harh theih tak miah loh hi! Tunah YHWH Pathian thlarauthianhlim hmangin kan thethawng ta e!

Kan manfiah thiam em? A ropuiin alo va mak em tiru! Kum 4000 chhunga Yisrael hnam 12 te thisen kai Jentail zing a an tam tur zia kan man thiam em? Ephraima leh Manasea kaltlanga Josepha thisen kai Jentail tam tur zia pawh kan man thiam em. Tin, chung Jentail ten Serpent seed(Kaina line) ami nupui pasal inneihpawlh a chi tam tak alo chhuah tak dan tur leh khawvel an luahkhah dan tur pawh chu kan hmufiah zel thei ang tiru? Hei hi Yeshua chhandam tum leh a rawn zawn te chu an ni a, amah ngeiin ‘Yisrael hnambo’ a tih te chu an ni. A awmzia chu Genesis ziaka Women seed chauh Pathianin a ngaihsak emaw kan tih lai khan Serpent seed pawh Pathian hian chhandam alo duh reng mai alo nih chu mawle!! Ava ropui em, Pathian hmangaihna hi a fair em em a, Bias zeuh pawh alo awmlo hi a mak a ni! Bible ah kan hmu thin a, Adama leh Setana chu atir ah mawi leh tha a siam an ni ve ve a, tin, vawi khat ve ve thil an tisual a, Adama chu chhanchhuahna a siam sak a, Setana chu a siam sak eih lo!! A mak inti em? Pathian hi a fair lo angin inhria em? Mahse a fair zia chu Women seed atanga Serpent seed pawh chhandam a duhna kawng atang hian a fair zia chu kan hmuchhuak mai a nih hi maw! Tihian Bible chuan min hrilh a, Abrahaama thlah atang Pathianin, “I thlah atang hnam tin anla thawveng ang” a tih kha khawvel hnamtin huap alo ni a lawm le! Kan hrethiam em? He saltang chhanchhuahna mission lo fin zia leh hmangaihna alo nasat zia hi.

Tichuan Jentail chu kan ni a, Ephraim atanga hnam lo chhuak emaw Yisrael hnam 12 te saltan laia an thisen kai te atanga thlah zel te pawh kan ni thei. A eng zawk zawk pawh chu lo nise Jentail chu kan ni a-  HNAMBO kan ni! Yeshua hian hnam tak Yisrael(Judaism) ah lut turin chhandamna mak tak mai a rawn siam a, Olive takah zawmin kan awm ta a ni a, kung tak chu Yisrael(Juda) a ni. Thenkhatin Juda hnam anlo hmusit a anlo diriam ringawt hi a kalhmang lo kan tih fo na chu. Hei hi Politics ani pawh kan ti thei. Chuvangin kung tak a zawm tawh chu Setanan Olive suak Greek leh Roman kung ah min phun ta daih a. Chu chu Paula te au hla ani ta fo mai a nih kha.

“Hnamte zing ata ka lak chhuah hun che u leh ram tina in darhna ata ka hruaikhawm hunah che u chuan, rimtui atân ka pawm tawh ang che u a, hnamte mithmuhah chuan nangmahniah hian ka thianghlimzia alang tawh ang, YHWH PATHIAN chuan a ti a ni.” Exodus 20:41

Mi thenkhat chuan genealogy chhui hi a diklo tih an hria a, an dik reng, chutih laiin YHWH Dana saphun kalphung erawh an haider leh ngat bawk si, chumi awmzia chu genealogy hmanga Israel hnamboa inchhui an duhlo a, duh si lo in Yisrael hnam an nihloh zia chu genealogy hmang thovin an DODAL leh thung si, “kan hmel a inanglo, kan hnar a bawng, kan mawng a fual, kan bawp a tawi, mongoloid kan ni chuti khati..." tiin genealogy chu tanfungah an hmang leh hlauh tihna a nih chu. YHWH saphun Danah chuan tupawh he hnamah hian Rinnain hmakhawsang atang khan an luh phalsak an lo ni reng zawk a ni. Chu chu Rabbi tute emaw thu leh hla a ni lova, YHWH Dan a ni zawk e. Aigupta atanga an chhuah pawh khan an hnam ni lo, an mahni zingah khan tamtak an telve bawk tih hi Bible-in min hrilh chiang em em a, chumi hnu zelah pawh a duh apiang an lut thei bawk tih hi kan hre bawk a ni. An Pathian YHWH kan duh a, Juda tlangval Yahshua kan duh a, an hnena ramtiam pawh kan duh a, an hnen a YHWH inpuanna Bible pawh kan duh bawk a, nimahsela, Yisrael NIH erawh kan DUHLO!?

DAN(TORAH) TUNDIN LEHNA

"Dan thu emaw, zawlneite thu emaw tiboral tura lo kal ka nih ring

suh u; tiboral tura lo kal ni lo va, tifamkim tura lo kal ka ni zawk.”- Matthai 5:17

Yisrael history kan chhiar chuan sal an tanna chhan leh hruai darh an nihna chhan kan va hmuhchhuah tak chu Dan(Torah) bawhchhiatna kha a ni. Hemi avang hian Pathianin Dan chu an tan a paih bosak ta em? Paih bo teh suh nang aw, an rama an kir leh hnu kum zabi 1 laia Yeshua a lokal a Yisrael hnambo ho arawn lam leh tum pawh khan a thupui chu Dan(Torah) tho hi ala ding reng ani tih a sawi hial a nih kha. He Dan hi a namai lova, India Penal Code anga siam leh duan mai mai ani heklo. Torah(Dan) hian Juda mite tan Kum sanglal ram(Millenium) alo din hun, Jerusalem thar an luh huna an nunphung leh awmdan tur a keng a, chu mi thlen hma chuan Torah(Dan) hian Juda mite hi alo train(zirtir) thin a ni. A awmzia chu Jerusalem thar ah Dan(Torah) a awm tawh lovang a, nimahsela a tak ngeiin Torah(Dan) anlo training thin kha zirleh ngai tawh lovin an hmang(nunpui) tawh zawk dawn a ni. Chuvanginc Juda hnam zawm duh apiangte hnenah pawh Pathian chuan Dan(Torah)zawng zawng chu an zawm ve tur a ni a ti reng a ni. Yeshua khawvel a lokal lai pawh khan Dan(Torah) kha amah ngeiin a zirtir ve leh anih kha.

Kan hmufiah thiam em? Verse lakkhawm a inhneh tir lam a nilo a nia aw. Yisrael ten Dan(Torah) an bawhchhiat avangin Pathianin a thlauh thla a. Hei hi Pathianin a hrem tihna a nilo, Dan an zawm hian a humhimna hnuai ah an awm a, an zawmloh hian Pathian humhimna ata an chhuak tihna a ni. Hetah hian Pathianin va hrem a thiang lova, va chhan lah a thiang heklo, an hmabak chu Setana kutthak tawrh a ni mai e! Chu Dan bawhchhiatna avanga Setana kutthak tawrhna chuan hnam hnih ah inthenin sal ah kum tam tak an tang a, hmuhsit cheksawlh leh nuihzat te, mipat hmeichhiatna avanga chi mangna leh lusunna te an tawng a. Nimahsela YHWH Pathian hmangaihna leh fin zia a rawn lang ve a, chi inthlah pawlhna te  atang chuan Serpent seed pawh YHWH Pathian angchhung ah lut turin a sawm ta theuh mai a. Tin, Dan bawhchhiatna tak pawh kha zawm nawn leh tur te, an tihdikloh lai ti tha a siamtha tur tein a rawn mission ta a nih kha. Mi tam takin Dan chu thuthlunghlui angin an sawi thin a, dik tak chuan Bible ah hian Pathian thupek leh thuthlung hi a hlui reng reng a awm lova, a aia tha zawk leh rinawm zawka thlak mai thin an ni zawk. Paula ngeiin Rom mite lehkha a thawnna ah pawh a sawi a, Dan(Torah) hmasa chuan tihloh tur min hrilh a, tilo turin chakna a pa thei lova, nimahse Dan(Torah) thar zirtirna ve thung chuan tihloh tur a sawi a, tihloh dan pawh min hrilh a(Paula chuan ‘Thlarau dan’ a ti). Tin, thlemna a awm rual rualin tlanchhuah dan pawh min hrilh a ni, a ti nghe nghe ani. Lei leh van a ral hma chuan Pathian ka a thu chhuak reng reng te hi an ral ngai lovang! Chuvangin Dan(Torah) hi hluihhlawn ani ngai reng reng lova, paih leh thiah a ni heklo. Chutihlaia deusawh leh ngainep a, a pawimawh tawhlo anga ngai tute chunga phurrit hi Pathian hian a en liam mai mai ka ring lova,  Yisrael mite tawrhna aiin an tuar tur hi a nep bik hauh lovang!   

NOTE: Matthaia 5:17 a Yeshuan a sawi ‘Dan tifamkim(fulfill)’ a tih hi theologian tam takin ‘tihbo/titawp(Destroy)’ angin an zirtir thin. Nimahse Barnes' Notes on the Bible- commentary chuan Kollosa 1:15 a "fullness" nena chhuizawnin "Fullfill" hi tihian a entir a; "to teach" or "to inculcate,". Chutiang bawkin Clark Commentary lar tak  pawn, "Amah chuan tha taka thuawiin a zawm a, kross a a thihna chuan a tifiah a ni(He completed it in himself by submitting to its types with an exact obedience, and verifying them by his death upon the cross)" tiin a hrilhfiah bawk. Conservative zinga chhuan tawlawl Scofield meuh pawn, "He lived in perfect obedience to the law. Jn 8:46 Mt 17:5 1Pet 2:21-23" tih meuhvin a comment a nih kha, keinin Destroy anga kan lo inzirtir hi chu a pawi thui viau ang!! 

Jentailte’n Yahshua an rin ve chiah hian, chu YHWH Pathian Olive kung, Judaism-ah chuan zawm an ni ve ta chiah tihna a ni. Chu chu hmasang atang a Pathian thupek a ni a, Juda mite sawi leh phuah a ni lo. Chuvangin Judaism kan zawmna chu Paula ngeiin a sawi a, tisa a serh tan aichuan thinlung lama serh tan hi Pathian ngaih ah a dik zawk a ni. Miin Judaism a zawm chuan an Dan a zawm bak ah an thinlungin serh an tan tur a ni a. Yeshua atang chuan miin a rin a, a thinlung atanga an duh phawt chuan Judaism a ni thei a.  Dan(Torah) a zawm bawk tur a ni. Genealogy lam a nilo a nia aw, Rev Chuauthuama ngei pawh hian thisena inkungkaihna Genealogy hmangin Judaism kan nihloh zia a ziak ka chhiar fu pek a. Pathian thu zir leh hre em em siin YHWH Pathian saphun kalhmang a hrelo erawh hi chu a pawi ngawt mai, Setana hi a lova fing ver vek em!

Deut 29:14-15 “He chhechham leh thuthlung thu hi in hnênah chauh thlung ka ni lova, vawiina LALPA kan Pathian hmaa dingte leh tuna kan hnena awm ve lote hnênahpawh hian a ni”

INDONA PHENA YHWH PATHIAN HMANGAIHNA

YHWH Pathian hmangaihna thuk zia leh san zia hi alo nasa mang e. Kan hria a, kan sawi a, thenkhat pawhin hrechiang mang lovin ropui anlo ti ve em em bawk a, ni e, hrechiang miahlo pawh hian lawm ngawih ngawih tur kan ni reng a ni! Women seed atanga Rul thlah(Serpent seed) a chhandam dan kawng hi a turu lutuk a, Setana hian a bum emaw a intia, mahse YHWH Pathian finna alo pha der silo a nih hi! Tin, Adama pakhatna zawk thihna ah a hruai lut a, Adama pahnihna Yeshua pawh chu Dan(Torah) bawhchhia angin a lantir a, a that a, mahse a bawhchhiatloh rah chu YHWH Pathianin Yeshua a kaitho leh ta daih mai a nih bawk kha maw! Keichu a mak hi ka ti a, a mak ka ti hi ka biangah mittui alo tla leh mai thin!

Genesis ziaka thlah pahnih chungchang kan sawi tawh a, chung thlah pahnih chu Bible tluan hian an indo chhoh char char zel a. A chang chuan ngatinge YHWH Pathian engkimtitheia hian indona ngai lova a tihboral hmak mailoh i ti ve em? Pathian de pawh a tluk der si lova! Mahse topic hmasa lam ah kan sawi tawh a, ‘Rulin ka mei rap se, keiin chu ila’ ti ang zia zanga YHWH Pathian hi fair lo leh diklo a ni ngai lova, Davida ngeiin kur leiluaiin a rorelna dik zia leh pelhe a awmloh zia a sawi chamchi a0 nih kha! Keini chuan kan chunga thilpawi thlen theitu anga kan ngaih te chu kan dahtha hmak hmak zel a; anlo dik thei em, anlo dik zawk mahna tih fiahna hun pawh pe lovin kan tanghma kan hai zut zut reng mai a nih hi turu? Chu erawh YHWH Pathian mizia leh rilru a ni lova, ani chu hmangaihna a khat, diklohna leh sawiselna tur reng reng awm lo a ni. Chuvangin YHWH Pathian hi Setanan a cho a, a ngam a, chu chu Pathianin phal lovin hnawl ta se “Mi Diklo” tihna a ni ang, chutiang bawkin van mipuite zingah zawhna sawi senloh alo piang zut zut bawk ang a, helna dang pawh alo piang leh thei bawk. Nimahsela YHWH Pathian chu mi dik leh dikna duh a ni a, Setana chona a pawm a, atan kum 6000 chhung pek nghe nghe a nih kha(Bible ah kan hmu).

Hei vang hian a lawm Eden huanah khan engvang nge Adama kha a tluk  nan ‘a chhia leh a tha hriatna thing’  kha a dah kher kher? Engvang nge Setana pawh kha alo awm kher kher? Kan hmuthiam mai tawh em a chhanna tur chu? YHWH Pathian nature chu JUSTICE(RORELNA DIK) a ni a, a pelhe hlek tur a nilo. Chuvangin Eden huana a chhia leh a tha hriatna thing pawh kha dah a ni a, chutiang bawkin nunna thing pawh dah bawk a ni, chu chu Judicial(rorelna lam thil)-ah chuan 50/50  Setana leh YHWH te chance inanga inbeihna a ni a tihloh theih loh. Chu chuan Bible pum hi kum 6000 chhung a awm a nih chu. Hemi chhung hian Pathian hi a chaklo thei a, a chak thei bawk a, chuvangin leilung pianhma daih ata tawh backup plan a fapa Yeshua ruatlawkin alo awm tawh a nih kha.

Chu indona fair turu tak mai chu Genesis ziak atang kan han enchiang chhoh ta a, a hmasa ber atan  Setana chuan chakna a chang a, Adama  a hneh a. A result lochhuak kan hria em - Serpent seed hmasa ber Kaina atang Kaina line tur alo piang ta a ni, a pawi lutuk. He indona hmasa ber phena thil inzepru kan hmuhthiam theih bawk chu - YHWH Pathianin Adama chu leilung enkawl turin a ti a, amah  Pathian angin a siam bawk a nih kha. Setana hian Adama a beih ngawtna chhan hi ‘a thin ka tiur ve mai mai teh ang’, ‘a zaidam em a, ka han fiam thinrim teh ang’ tih lam a nilo. He leilung hi a duh avangin Adama a Thih tir a. Tin, a thlemnaa tawngkam pawh ‘Pathian ang’ tih a nih avangin Leilung hi luah a, amah chu Pathiana insiam a duh a nih ber. Alo mak ngei mai tiru!!!!

NOTE: Yeshua hi engvang nge Adama pahnihna ang a nihna chhan kher kher hi mak inti ve em? Paula ziak kan va en chuan, “Hmeichhe pasal nei chu a pasal dam chhung zawng danin a pasalah phuar belhbawmin a awm thin; nimahsela a pasal chu a thih chuan, pasal kawngah dan ata chu thlahin a awm thin.” (Rom 7:2) a ti a. Hmeichhe pasal chu Adama a ni. Ani chu Setana custody(thuhnuai) ah a awm tawh a, a awm chhung chuan Setana nen mihring chu kan inzawm tihna a ni. Chuvangin Paula ngeiin a sawi a, Adama pahnihna anga Yeshua lokal chhan chu Thi turin a ni, mahse chu thihna chu Setana custody(thuhnuai) a thihna ni lovin, YHWH Pathian anchhedawng angin a ni, chu chu lei tawk lo van tawklo- an chhedawng boruaka khaikan/awm tihna a ni. Chuvangin Yeshua hi Adama pahnihna anga alo pian hian Setana custody atang mihring te anlo chhuah theih nan anchhedawng thing a khai kan kha a rawn mission ta chat a nih chu. A thih veleh, Setana custody atan kan zalen ta a, pasal thar, pasal thi ta ang nilo YHWH Pathian fapa Yeshua kan nei thei ta a nih chu!

A dawt ah Abela leh Kaina phena Setana leh YHWH indona kan hmuleh ta a, Setana a chak leh tlat pek bawk; Abela a thi a, mahse YHWH Pathian hmangaihna turu tak hi kan hmufiah thiam em- Setha kha? Tichuan khawvel pumpui hi thlah pahnih ah anlo inthen ta duai a, Kaina line(Setana) leh Setha line(YHWH Pathian) in an darh ta phak a nih chu.

Tichuan Bible kan keu chhoh zar zar a, Setana chuan Women seed atanga Setha line tih chimih leh hneh a rawn tumchhoh dan kan hmu leh ta zar zar a; Sari chhul ah alo tlankhal a, chutiangin Mosia thah a tum nasat dan te; tin, Jakoba, Josepha. Khang ho kha Kaina line(Setana) hian hneh hi alo va tum nasa em em tak aw!!! Yeshua ngei pawh kha hneh a tum dan kan hria a, chibai buk tira a thuhnuaia awm tur leh ram pek hial a tum a nih kha. Mahse hnehna a chang lo!

Mak tak chu Yeshua hian a Pathian fapa ropuina leh thiltihtheihna zawng zawng alo pianpuilo hi a ni. Engvang maw? Lo pianpui nise Setana chet dan tur leh ruahmanna zawng zawng a hre vek ang a, a tuar ve tho si ang, mahse chu chu BUMNA a ni a, Justice(Rorelna dik) a ni ngai lovang! Chuvangin mihring dik tak angin, a awmzia chu Adama hmasa ang chiah chiahin alo piang ta a, alo thang lian a, hriatna leh finna lam ah pawh mihring ang chiah chiahin alo thanglian bawk a, mihring ang chiahin YHWH Pathian thlarau pawlna pawh a chang ve vek a nih kha(Isaian a sawi nasa lutuk, Oneness hovin YHWH Pathian emaw tiin anlo twist thung). Dan(Torah) hnuai ah alo piang ve bawk a, a zawm a, a zirtir ve bawk. Hetianga fair leh dik taka alo pian avang hian Setana pawn a thihna turin a do ngar ngar a nih kha. Kum 32 lai mai dik tak leh Dan(Torah) pawh buai hauh lova a zawm hnu ah phei  chuan anchhedawng thing a khaikan chiah a hmabak ta e. Khaikan anih vaih chuan Setana a chak dawn si lova, chuvangin anchhedawng thinga a thlen hmain Setana chuan a thih theih nan Gesmani huanah a tuar tur rapthlak zia a pholan sak a, tlanchhe turin a thlem a nih kha. Tin, Gesmani huana a hnehloh hnuin Rom sipai hmangin Kalvari kalkawng ah thi tlaw turin nasa takin a sawisak tir a, mahse Yeshua hian a mission a chiang a, a hria a, Kalvari tlang thlen hma chu thih tlaw mai mai a tum lo, chauh a thiang heklo, a hmangaihna hi a nasa lutuk!. Chuvangin a tho va, nasa taka tuarin Kalvari tlang a pan a nih kha. Amak em mai, a mak em mai he hmangaihna hi! Anchhedawng thing ah khaikanin ‘a kin ta’ a ti a. Tichuan Dan(Torah) bawhchhiatna chu thihna a ni si a, Yeshua lah chuan alo zawm si. Diklo takin Setanan alo that hman ta bawk si a, YHWH Pathian chuan Yeshua(Adama pahnihna- mihring zawng zawng aiawhtu) chu thihna lak ata a kaitho leh ta a ni, khawvel pumpui a Setha line leh Kaina line tan thihna ata thihtheih tawhlohna a sual chhuak ta a, khua alo var ta a nih hi! Amein! Yeshua hi Kalvari tlang a anchhedawng thing thleng lovin han thi ta vaih se chuan Setana hi a chak ang a, mihring hi thi hlen tur kan ni ang. Yeshua ngei pawh hi a boral hlen taw hang! Chuvangin he Yeshua tuarna hi a ril lutuk!!

Hei vang hian a lawm YHWH Pathian hmangaihna hi rinhlel hleih theihlova alo dik zia leh fair zia chu. Setanan thihna hmanga a kutthakhnawih te thihna lak ata min hruaichhuak a, Dan(Torah) bawhchhiatna avanga Setana kutthakhnawih Yisrael fate avangin khawvel pumpui Dan(Torah) zawm famkimna ah a hruai kirleh  ta bawk a ni.  A ropui lutuk, YHWH Pathian hi fakin awm sela, Yeshua hi kan tan hero ropui leh kan chuan tawlawl lo ni reng rawh se. Tin, hei vang ringawt pawh hian Pathian lam hnaih a, amah chawimawi a, a thu zawm mai tur kan ni!!