Original sin

He thu ka ngaihtuah a piang a lo lang fo mai thin chu Pathian mihring alo channa chhan inphumru thuk zet mai hi a ni. Tih tak emah chuan hindu ho Pathian pawh mihringah alo chan ve kha maw! Bhuddha ngei pawh pathian tluk hial leh pathian tisaa lo chang hialah an ngaih kha maw! Liberalism atanga ka thlir chan phei chuan heng sakhaw dang rinna hi paihthlak ka tum hauh lo a, paihthla theih pawh ka ni bawk hek lo! Mahse Pathian ro ro ah he bible a tisa lo chang Pathian hi engvang teh hrep nge tisa alo chan kher kher tih erawh ka ngaihtuah tawp theihloh chu a ni.

Vawikhat chu bible scholar ho nen Pathian tisa alo channa chhan hi bengsik meuhin kan chai ho hrep tawh hial a. Thenkhat chuan Pathian tisa alo channa hi hmangaihna avang chauh a hmawr bawk tum ta mai an awm thin. Ani lo e..  ti dawn pawh ni ila kan hriatfiahna ram a hrang miau si a. Ka hriatthiam dan ang a hrethiam turin barhluih pawh ka tum chuang lo, an tan alo khak hlauh phei chuan uihawm tham tak an luakchhuah leh mai dawn  sin.

Pathian tisa alo channa ropui tak mai hi engvang nge taksa/tisa kher ah alo chan tih zawhna hi ka question fo thin. Zawhna awm thei tak a ni- zirtirna lar zawkah chuan  sual avanga thihna hi Thlarau inmihran  tih a nih miau vang a lawm le! Pathian chuan kha thei kha an ei ni la la in “in thi ang” a ti a. An ei a, an thi ta reng a. An thihna pawh thlarau thihna a ni tih ala ni zel fan mai.

Hei tak mai hi a ni zawhna lian tak piang thin ta chu- thlaraua thihna hi engvang nge thlarau vek nilo tisa veka tlan a ngaih tih lai hi a ni! Anih leh thihna chu thlarau inmihran tihna maw a nih dawn ? Ni lo, setana ngei pawh Pathian nen an inmihranna a rei tawh lutuk, bible hian ” a THI”  tih tawngkam hi a hmang chhin eih lo a, a hmang lo tawp a ni zawk. Bible-in THI tih a hman hi thlarau inmihranna(spiritual death) niloin taksa thihna(physical death) a ni zawk.

Anih leh THIHNA chu sual a ni em?  Bible dispensation kan keu chuan mihring nihphung dik tak hi  Thi tur a ni lo a, Thi thei  a ni zawk tih hi a ni. Pathian chuan mihring chu leilung luahkhat turin a ti a, THI turin a ti lo a. THI THEI an nihna lak ata warning a pe a, ” In ei chuan in ei ni la lain in THI ang” a ti a ni. Chutichuan thihna hi Pathian dan kalh, Pathian tumpui loh ram, Pathian dan zam pawn a mi a ni.

Sual tih hi Hebrai chuan Khatauau a ti a, Greek tawngah chuan Hamartia  tih a ni ve leh a; chu chu nihtur ang nilo, nih tur ang phalo, tumpui ram thleng zo lo tihna a ni. Thihna pawh hi Pathianin mihring a tumpuiloh ram a nih avangin sual a ni.

Science lam atanga chhui chuan  he thihna hi alo dik thlap mai pek a. Cell hi a nih tur ang a nihloh chuan sual kan ti ngailo a, natna kan ti mai thin. Thihna pawh hi sual a nih avangin leh Pathian tumpuiloh ram a nih avangin natna a ni ve zawk a. Medical atang chuan natna reng reng chu DNA corrupt vang a ni a. Chu DNA chu thisen chhungah a awm a. Thisen thianghlimlo kan pai avang leh kan DNA corrupt avang hian mihring hi Thi thei  atang Thi tur  tih code alo chuak ta mai a ni.

He natna hi bible hian a hrechiang em em a, medical emaw science lam zawngin dah diak diaklo mahse Pathian thu chu THU NUNG a nih avangin thudik awmsa chu alo lang uar uar zawk zel a nih hi. Adama te nupa sual saruak khuh nan savun kawrfual a siam sak a(thisen a chhuah ka ring), Abrahaama hnenah serhtan thuthlung a pek ah khan serhtan aimah chuan  “thisen”  chhuak kha a pawimawh a rinawm zawk a, Sual thawina thisen maichama theh thin te, Pathian thisen(Hebrai- ah tisa tihna ve tho a ni Hbr. Psykhe, nephesh) alo channa te, Isua thisen chhuakte hian  hian Thisen chhunga awm DNA corrupt zia a entir a.

Isua ngei chuan no a uain chu lain “hei hi ka thisen(Hbr. Psykhe, nephesh) aiah, min hriat reng nan ti thin rawh u” a ti a. He thu hian thisen chhunga Pathian theihnghilna DNA  codon lo awm te, terminate codon te awm zia a tifiah em em a. Chu chu Isua ngeiin tihbo leh hneh tumin “min hriat reng nan..” a ti tawk tawk te hian tunlai miten sakrament an dampui hmak thin ram atang hian fel hlel awm hauhloin a dik a ni tih a chhui chhoh zar zar zawk a ni.

Thenkhat chuan Law and Order zawmloh hi sual a ni an ti a. Nih chu ni teh mauh mai, amaherawh chu Law and Order zawmloh chu thlahte zel thlenga THIHNA khawp ni turin Pathian mite zingah  zawm mi an lo chhuak zel mai si a (Eg. Nova, Abrahaama, Lota adt). Dan bawhchhiatna lai tak erawh hi chu inherit theih natna a nilo tlat thung si a ni.

Medical lam chuan a zia anlo phar leh tuar mai a. Inherited natna reng reng chu thisen atang vek a ni. Adama te nupa Eden natna chu anni a chin mihring piang tawh phawt chuan a fel emaw, a fello emaw he natna hi a thisen a bet tlat a. Fel ber angin inngai mah se, nu pum chhunga diploid a nih tan det det atang SUAL a lo ni fel der tawh zawk a ni. Thi tur a piang alo ni a ni.

Ni e, Thisen ah hian sual a awm theihna hi kawng tam takah hian a thleng mek a ni. Setanism rawngkai reng reng ah chuan “thisen inthawina” leh “mipat hmeichhiatna” hi a hluar ngei ngei a. Setana an biakna hmanraw hlu ber a ni bawk. Unbroken cure – chhiar tawh kan awm chuan hei hi diklo theilo a ni. Setana biak pawhna awlsam ber chu thisen hi a ni tlat!

Heng atang hian THIHNA hi enge a nih a, Sual hi enge a nih, Thisen hi enge a nih tih chu a langfiah tawh em ang chu maw. Kan fiah zo emaw fiah zolo pawh nise Pathian thlarau tello chuan second khat pawh nung theilo kan nih zia hi hre nawn mawlh mawlh ila. Pathian hi fak tlak a nih zia pawh hi I hre nawn mawlh mawlh teh ang u.