Ramvachal ka ni thin...

Kum tam chu alo  liam ve ta reng mai ka ti. Naupang chhia tia rualu zawk ten min koh thin lai kha a ni a. “Bawiha, mami, mama.. Meizial kuhva min va lei the u”tih tura tirh awm tawk vel lek  hun kha a ni. Kha hun kha a ni he thawnthu intanna leh tawpna, ka lunglen thinna chhan em em chu.  Fur laiin sikul kal thulh thak khawpin u zawk te nen buk lem sain nileng hun kha kan hmang thin. Keini khatih hunlai khan a nawmzia tem pha chiah lo mah ila, tun hnu hian a nawm tur zia hi a siper ka man pha ve det det tan hian ka hria. A chhan chu hlim harsat zia hi mifing ka ni intih chin atang ngat mai hian alo har tawh em em thin a nih hi. Naupang mai kan la nih avangin buk chung ami tur di hnah fawm khawm turin kan chhuak tham tham a. Mi kawmkara buara leh buk lem  bang a tana hman theih tur lehkhakhawng bawm zawngin hnap tla purin kan tei nileng thin. A nawm leh hlimawm zia kha dang dai tak a ni!

Buklem siam  hi naupang e tilo chuan thiam ang tawk tawk kan siam  hian a awm tur te dawl tawka siam hi u zawk te khan an thiam ve leh em em lawi zel bawk zel a. An tan chuan “kid tha mi” nih kha kan tum ber thin a ni a. An ni pawn “kid tha tak” turin min duh ve bawk thin. A taima leh zelthel inkar erawh  a hla hle a. A taima ten eitur an dawng hnem a, a zelthel ten vin leh hauh an hlawh deuh reng thin bawk. Ramhnuaia chhuah nikhua te hian ramvachal nih tir hi min tum ber thin ni hian ka hria. Ni e, keipawn chu chu tun thleng hian ka hlawk pui tak zet a ni.

Vawikhat chu u zawkte telloin lui kal kan rawt a lawm le. Ka thiante chuan aia nau zawkte an hruai a, keipawh chuan ka nau leh midang pathum kawikhawmin lui lam pan tur chuan len, hawlhrawk leh hrui zel, tlang leh kham deuh lawnna tur te, bailem chhuanna tur bel leh chawthing te  kan inak bawr khawp mai. Veng chhung tornament a awm tum pawn kelawng ngat a football khel team kha kan ni ve ngei a, kan team hmingah pawh “Ramvachal” ngat ni thin kha kan ni. Chutia mi sawm vel lui lam pana kan kal diah diah chu tun hnu hian Adventure team te pawh kan ang rum rum hian ka hria. A hlimawm in, a nuam em em a. Kha aimah chuan ramlam a kan tui na kha nuam ka tih ber thin!

Ram lama kal thang, mi thing kihruk leh puthaw ruk hrat tak mai kha kan ni thin a. Ram kal hi chu naupang e ti lo chuan kan hneh par par hle mai. Chakai khawrh zana luikawr thui mangkheng kan zawh tum te khan mizo mipa chuan a ram chin a hriat bel tluk zetin a chakai khawrhna pawh a hrechiang tur a ni tih kha kan motto kha a ni a. Hemi tum zet pawh hian naupang sawm rual zet chuan karlovah lui kam tuaka lungpui inchherchhuan luah mai chungah  chuan a ram neitu nih hmel zetin kan ding far mai. Thlanglam ah chuan tlang khawkrawk a tam em em a, hmalam ah chuan pial tlep tlang indawh chhoh luah mai hi a awm bawk a, chhaklamah chuan vantawng khawhthla ang mai a tui lo luan thlakna sang tak mai tohlawt chu a awm bawk.

He lui hi vawikhat kan kalna mai a ni lo a, vawi 50 vel daih chu kan kal tling tawh ngei ang. Mahse a hmun hi  nuam em em thung erawh hi chuan min tihlim thin a ni. Luikam tuakah chuan lui pangpar chi hrang hrang, a par var atanga a sen thleng hian a tam em em a. Mau lah chu a tuai khawrh nghal mai chakawm khawpin a tuai an lo tam em em khawp a. Lui tih takah  chenna atan a fim tha leh zau tha tak tak mai chu a awm bawk a. Thian te pahnih chu anlo zu zuangthla hman hram bawk.

He lui hi chu ka ram ti ngam ngat tur khawp a kal ngun kha kan ni bawk a, kan hawina lam a piangah hian mit hian thil thar alo hmu zung zung zel. A rim nam leng vel atang pawn lui awmdan, ruah a sur dawn nge sur dawnlo pawh hre vek tur khawp khan hrebel kan ni a. Kan kalna lai tur leh kallohna lai tur te kan sawi fel hnu chuan naupang thenkhatin bungbel la chhuakin ei tur siam an tan a, buhfai, dal tih chu a tlang lawn a ni. Adang leh chu chakawk leh sangha te an ni a, chu mi zawng tur chuan midang ho chu kan chhuak tham tham tan ta a.

Awle, lui kham khawkrawk, ka pa Lalna ram, ka pa ta ti ngam ngat tur khawp a intiramvachal khan chu lunghmun kara sangha zawng tur chuan ka chhuk tla ta zel a. Hrui zen, hawlhrawk leh iptepui a chempui chu ka neih ropui kha a ni a. Taitesena pawn chu bak chu a neih ka ring bik lo. Chutia lungpui ka han lawn chhuak chu rinloh leh beisei ngailoh takin ramvachal chu lungkhawk rawk karah tlu lutin, ka kut ka bawhtliak ti tih der ta mai! A na pawh ka ti ngam chiah lo a, pa lo nih ka hlauh em avangin. Mahse ka nu bul chu nise hnute hnek te ka dil hial lo maw ka ti khami tuma a nat zia kha! A tawp ah chuan kan rorel zawng zawng thulh a ngai ta, kan veng lam pan chuan kan haw leh hnak hnak a. In kan thlen chuan damdawiin pan pui nghal ka ni ta. Chumi chin atang chuan ka chhungten ram kal reng reng an phal ta lo a, tun thleng hian ram lam hian ka lunglen hle mahse kal dan ka thiam tawh lo a, kal nan hun pawh ka nei ta meuh lo chu a ni ta e. C. vansanga’n thiam zeta “buannel ramdai” chuan min vel tap ta fo mai; chutichuan zawi zawiin ramvachal chu alo chuai ta raih raih mai a ni..