Thihna thupekah “thlarau” a tel ve em!?

Dan pawnah min hnawtchhuak ta rau rau a nihna tawl tawl sawi mai hi a tha zawk tlat, chianglo ruai a thlarau leh taksa/tisa ngaihpawlh avangin piangthar da leh an tam zia ka hre ve kur mai si a. Thlarau bo lah an tam narawh e! Meidila lo kan tir tawk lah bo lo. Rilru hah tak chung leh duhthawh tak siin ka rawn hungchhuak e.

PATHIANIN  MIHRING A SIAM DAN LEH A TIHNUN DAN

Theologian leh pastor hrang hrang tena mihring hi thlarau nena sawifin nghal tawp mai an hrat zia hi ka ti thin. Gen 2:7 “Tin, LALPA Pathianin leia vaivutin mihring a siam a, a hnârah chuan nunna thaw chu a thaw lût a: tichuan mihring chu mi nung a lo ni ta a” tih a ni a. Mihring hi minung nih tir nghal tawp mai hi a dik lo, mihring a siam zawh hnuah minung (living soul/nephesh) a lo ni chauh zawk a ni. Minung nih nan nunna thaw(neshamah) a thaw lut a, chu thaw chu 1 Korinth 15:45 ah “Chutiang bawkin, ‘Mihring hmasa ber Adama chu mi nung a lo ni,’tih ziak a ni; Adama hnuhnung zawk chu nunna petu thlarau a lo ni a” a ti a. Thaw chu thlarau a ni ta tih Joba 33:4 ah  kan hmu ta a ni (Zakaria 12:1, Joba 27:3, Sam 104:30). Mihring chu vaivut mai atanga siam a ni tih chu hai rual a ni ta lo. Mahsela chumi piah lamah chuan tinungtu erawh Pathian thaw/thlarau a ni tlat (Joba 38:2).

THIHNA AH  HIAN  THLARAU HI  A THI VE LO

Gen 3:19 tin, leia i kîr leh hma loh chuan i hmaia thlantui luang zawih zawihin chaw i ei tawh ang; lei atanga lâk chhuah i ni si a: vaivut i ni a, vaivutah i kîr leh tûr a ni,” a ti a.

Mihring chu vaivut mai a nih thu kan hre ta a. Engmah thatna reng reng neilo, a tha lai ber pawh puanchhe hnangkhai tluk lo. A mawi lai ber pawh tuktin par tluk zolo a ni a. Pathianin nunna thaw a pek avangin alo nung a, minung alo ni ta chauh a ni.

Khatia EDEN huana Pathian duhloh zawng an tiha Pathianin an chunga thil lo thleng tur a sawi “in thi tur a ni” tih ah khan minunga chu thi thei a ni tih a chiang em em a. Chu minung chu sualna avanga a thihni chuan alo chhuahna vaivutah a kir leh dawn a, amaha tinungtu thlarau erawh chu Pathian hnenah a kir leh dawn a ni. Mihring chu mitthi alo ni ta tihna a ni, mitthi chu taksa/tisa chauh hi a ni a, thlarau hi a thi ve lo.

Thuhriltu 12:7 Vaivut chu a awm a awm angin leiah a kir leh a, thlarau chu a petu Pathian hnenah a kir leh a.

Joba 34:15 Mi nung zawng zawng an boral rual ang a, Mihring chu vaivutah a chang leh mai ang.

Thuhriltu 3:20 An zain vaivut a mi an ni vek a.

Sam 22:19 Vaivuta chhuk tur zawng zawng te chu a hmaah an la kun ang.

Joba 17:16 Seol kawngkaah a chhuk ang a, Vaivutah kan chhuk dun ang.

Sam 146:4, Thawin a chhuahsan a, ani chu leiah a kir leh a; chumi ni la la chuan a ngaihtuahna te chu a bo ve nghal a.

Sam 104:29 I hmai i thup a, an mangang thin a; An thaw chu i laksak a, an thi a.

Isaia 26:19 I mitthite chu an nung leh ang a; ka mi ruangte chu an tho leh ang. Vaivuta awmte u, harh ula, hlim takin zai rawh u:L i daifim chu thlaite daifim ang a ni a, lei hian mitthite chu a paih chhuak dawn si a,” tih hi.

Daniela 12:2 Tin, an zînga tam tak lei vaivuta mihîl tawhte chu an lo thangharh anga , thenkhat chu chatuan nunaah,thenkhat zahna leh chatuan hmuhsitawmnaah.

Joba 7:21 Engah nge ka bawhchiat i ngaihdam lohva, Ka khawlohna i lak bo loh le? Tunah vaivutah ka mu dawn ta si a, Mi zawng chiam ang, mahse, ka awm lo vang.

THIH HNUAH  THLARAU KHAWNGE A KAL

Thihnaah mihringa thlarau a thih ve tak siloh ah chuan chu thlarau chu a petu Pathian hnenah a kir leh dawn a ni.

Mihring hian thaw hi Pathian hnen atanga dawng a ni a. Mihring thihni chu Pathian a thaw a laksak ni chu a ni.

Sam 104:29 I hmai i thup a, an mangang thin a; An thaw chu i laksak a, an thi a

Joba 34:14 _15 Ama thlarau chu ahnea a lak kir a, Ama thaw chu a hnêna a lak khâwm leh chuan,  Mi nung zawng zawng an boral rual ang a, Mihring chu vaivutah a chang leh mai ang.

Thuhriltu 12:7 Vaivut chu a awm a awm angin leiah a kir leh a, thlarau chu a petu Pathian hnenah a kir leh a.

TLIPNA

Strong Exhausive Concordance kan en chuan; Sam 104:29 leh 146:4  a ” BREATH/THAW(7307 ruwach/ruach) hi Thuhriltu 12:7 leh Joba 34:14 a ” SPIRIT/THLARAU(7307 ruwach/ruach)” nen hian tawng thuhmun leh kawh inang an ni a.

Gen 2:7  a “BREATH OF LIFE/NUNNA THAW( 5397 neshamah)” tih leh Joba 34:4 a “BREATH/THAW( 5397 neshamah) hi tawng thuhmun leh kawh inang alo ni leh ta a.

Heta tanga chiang ta em em leh zirchhuah theih ta chu MIHRING chu a thih ve leh  vaivutah a chang ang a. Amaha thlarau chu Pathian hnenah a kir leh dawn a, Pathian ta a ni amah (mihring) a thlarau chu. Chuvangin thlarau chu hrem thei emaw sual thei a ni hauhlo a. Mihring tinungtu zawk mai a ni. Chu thlarau chu a thi thei hek lo.