DAVIDA LEH KEI

Ka naupan laia ka nu bulah, "Nu, Davida ang nih ve ka duh, ka thei ang em? ka tih lai kha ka ngaihtuah chhuak zawk mai. Tunah chuan alo har zia hi ka tem hnem ve ta. Mahse Davida ka ngaihsanna erawh a zual telh telh thung si. Ka ngaihtuah fo thin Davida hringnun khawhar ve thin tur zia kha; a naupan lai atang reng a Pathian hruaina dawng, sakeibaknei pawh hneh hial thei kha a ni a.

Alo puitling deuh deuh a ral hrat mi ni der silo khan Goliatha a han vawmthlu leh thuai a. Kha naupangte chunga Israel mi ho innghah zia leh an lawmzia tur te kha ka mitthla ah hian ka suangtuah fo thin. Lal saula'n thikna avangin tihhlum a tum a, kham kar leh thlaler hmun reh taka a tlan bo lai te kha mitthla ah hian a zam  nei nuai a sin.

Ni e, Pathianin 'ka rilru ang pu mi' a ti reng a nih kha. A beramte venga a tingtang lungtileng thei nena a zai ri mawlh kha, "Min vengtu chu Lalpa a ni a, ka tlachham lovang" a tih ngawt mai  hian rilru ava khawih em. Keini chuan Pathian hnen atanga kan dil alo thlenloh ni chuan Pathian buhzem ring lo, ensan ni daih ah kan inngai a.

Lalpa hi kan tlachham leh fo thin chu a nih hi tiraw u. Heng avang te hian nun khawhar leh nun hrehawm, lungngaihna chi hrang hrang ten min zem fo thin a nih hi. Chawlhna dang kan zawng a, kan hmu chuang silo. Lungawina dang kan zawng a, kan hmu bawk silo. Davida erawh kha chuanin, "ani chuan hlobet hring dup hmunah te min bawh tir thin a, chawlhna tuikam ah te min hruai thin" a ti a sin. Ava awhawm em !

"Ka lu ah hian hriak i thih a, ka no ah hian a liam reng a", he chang ka chhiar a piang mai hian keimah hi ka inthiamlo fo thin. Ka chunga malsawmna alo tlak ve det det a keipuisahauh tun a ka uikawm zia te. Ka thinlungno a ruah zia te hi ka indem ngawih ngawih thin. Lalpa hriakthih tawh, midangte avanga taksa leh rilru him damlo a ka awm fo te hi  ka thinlung a no hi ava ruak em! Lalpa that zia tem ve reng tawh si a chapona tlangah ka lo lawnkai leh hret hret te hi ava pawi thin em.

Kan chakloh zia te chu Lalpa hian a hria a lawm; endawng, kalsan ni mah ila ani chuan min hmu reng thin a sin. "Aw Lalpa, nangin ngun takin min en chhuak a min hre ta. Ka ngaihtuahna te hi hla tak atang pawhin i hrethiam thin a…ka kal leh ka thu hi mi en ngun thin…“. Keichuan he chang hi ka mittui kohtu ala ni fo mai. Vawikhat chu chhungkua ah harsatna nasa tak maiin min tlakbuak a, khami tum baka retheih kha kan la nei ngailo.

Ni e, ka nu nen tawngtaiin Lalpa kan han au chu ani chuan hla tak atang minlo ngaithla a, kan mangan au thawm te chu lo hriain kan chhungkaw harsatna zawng zawng chu min chinfel sak ta a nih chu. Kan va lawm em! "Leilungte chu nghing dur durin, tuifinriat  te chu phul bulh bulh mahsela kan hlau chuang lo ang". Natna mak tak mai ka neih ve tum kha ka la hrechhuak fo thin.

Ni khat kha ka tan chuan a rei mah mah em aw, a rei a ni dik tak chuan! Ka khum chungah mu chungin  ka tawngtai a, zan ka muhil thei silo. Zanlai alo thlen meuh chuan a na alo chhuak leh a, ka tuar zolo chu ka mittui a tlasawk thei. Thei leh theiloin ka tawngtai ta a, ka mitvai nge ka hre hauh lo..ka kiangah chuan puanvar sin chu alo ding a, ka lu ah dawmin, 'ka fapa, i dam tawh e' a ti a, ka  muhil ta nghal. Zing alo nih chuan damdawi in lam panin kan han  inzei ta a. Tunah chuan ka dam ta! Kha zana ka mi hmuh kha tun thleng hian hmuh leh duhin ka nun hi a khawhar em em a, ka hmu leh tawh ngai reng reng lo!

Heng avangte hian a lawm Sam hla siamtuin, "ka han men chuan a kiangah ka lo la awm cheu thin " a ti. Amah lo lam ah kalin pensan thin mah ila, tawngkam mawilo leh setana lawmna siam fo thin mah ila. Ani chuan duat leh hmangaih takin, amah kan kalsan vang vangloh na turin hmanrua a la khawm a, a rem fel a. A kiangah bawk min kai lut leh thin a nih hi!

Atawp berah chuan he thu hi a ngaihnawm mai pawh niloin a lova dik em ka ti thin. Ka hmangaih leh duh em em, a aw nikhat pawh hrelo a awm theilo, nupui tur atan a ka hual reuh reuh maiin a sernung na tak min siam a. A ngaihzawng ngei mai chu ka thianpa a han nih leh tlat mai te, a thian te zawng zawngin min han tih-el vel han hriat chuan  tuar a har duh  vawng vawng hle mai!

Mahse Davida chuan tihian minlo tlan khalh pek a, "keimah ah hian thinlungthianghlim tak siam thar leh ang che…” a ti a. Mahse ka in-control zo si lo," Ka chhiatna zawnga min sawiseltu te hi ka hmelma leh minhawtu te an ni lo; ka mi anpui leh ka thian hnai tak te an ni " a han ti chu ka dam sawng sawng ta mai! Lalpa chuan kan thatna tur bakin alo rel ngai lo hi a nia.

Tunah chuan ngaihzawng te chu kawp duh ila paruk lai kawp thei tur khawpin tihhausak ka lo ni ta. "Aw,  Lalpa that zia hi tem chhin ve teh reng u.."  tih hla thu hi kan changchawi tur alo ni reng a lawm le. Kan tawngtaina hi chhanlohin a thamral mai mai thin emaw hi kan tia, mahse 'yes', 'no',  'i have another plan'  tih hian min lo chhang reng thin zawk a!