Tleirawl thianghlimna chu pangpar mawina nen ka tehkhin fo thin

Zing ni chhuak mawi tak mai cho tawk chiahin chu  pangpar chu a kuhmum atang alo par chhuak a. Boruak thiang tak karah daifim a far kauh kauh bawk nen; chu pangpar chu bawlhhlawh khu leh rannung la tih buai phak lek loin a mawina nen chuan a han par sar mai a. Rawn par chhuak hlim chauh a nih avangin mawina lamah chuan khum zo reng reng an awm lo, a hring no nghel mai a nih chu mawle.

Chutiang chiah chuan khawvel sualna in ala zem loh, la tem chhin hek lo; hruai kawi tu pawh la awm hauh lo tleirawl chu a thianghlimin a mawi em em a sin. A danglam zia chu pangpar  nichang do lai leh zingdaifim chauh la tawng kuhmum atanga lo parchhuak det det ang hi a ni.

Han en mai pawhin a mitah der na a awmlo a. A thinlung lahin sual ala pai lo. Mipa kut hmawr pawha la tawhloh a nih zia a chezia atang a lang chiang si. Biahthu reng reng la hlan loh a nih zia pawh a tawngkauchheh atang hai rual a ni lo.

Hetiang tleirawl hi mipa tan chuan ro hlu a ni a. A thianghlimna leh duhawmna chu vanneihna tawp a ni a. A thinlung, tuma la hmangaih ngailohna ngei hi mipa tan chuan chan theih rualloh a hlu ngei chu a ni. A lei zo leh buk tawk hi an awm ka ring lo.

Lengleh nuthlawi zun nat zia sawi huaitu chuan  vaivut khu -a khat boruak aia zing boruak thiang hip nawmzia ala tem lo a ni chek ang e. Chumi chuan khamkar tui tling fim tak ai chuan kawtkai  a vaivutin  a bawm khah tuikhur tlan pawh pawi a tih ka ring lo a. Ram tha tak tlawhpawhloh neih ai chuan mi ram chhengchhe tak pawh neih pawi a tih ka ring lo leh cheu a nih chu.

Mak tak mai chu ngati nge hetiang tleirawl thianghlim sawi hnawma lengleh nuthlawi sawi nuam an tih zawk fan le! An hnahkhat nihna an hlauh tawh chuan an hlutna hi a da ve hret a sin. An thianghlimna an hlauh tawh ngat phei chuan amah phulotute pawn an zuam et et tawh mai zawk a ni si a.

Ka ngaihzawng hmasa ber(pakhat chiah ka la nei tak tak) nena kan inbiak hmasa ber pawh kha ka la hre reng. ‘Enge i tih‘ tih ringawtah pawh sen tun tunin sawi tur ka haihchham nghal vek, ‘ka ngai che‘ a ti leh lek phei chu khumah zuang lutin ka inlukhup nghal! Ka taksa zawng zawng hi a tek chhuai chhuai ni ber hian ka hria.

Awle, kan tleirawl chhuah phat a kan ngaihzawng hmasa ber te mi deh dan hi chu a dang zar a nia tiru? Kan loin nei ta emaw neilo pawh ni ila rilruah a cham veng veng a, upa te tihdan takah Antam tel pawh an inpe lian bik an ti a nih kha. Keichuan lengleh ai chuan hnahkhat ngat ka thlang e;  thinlung bawmah ka cham rei deuh zawk mahna.  Bawng pawn luangno hlir a thlang an tih kha maw….