Pa min ti ang chu aw....!

Zan dang ang bawkin  inkhawm turin chu veng chu ka two wheeler chuan ka inkhalh leh ta vang vang a. Ka chhuak hma bawk a ka vanneih asiamin ka ti dawn nge  dar a rik zet hma chuan thian te in ah  ka lut  kawi chu  inhmuh a khat em mai tih pahin ka thiannu chuan thingpui in phawt ila,biakin chu kan pan dawn nia a ti a. Chu inbul mai chu biakin chu a nia, dar pawh ala ri lo.

Chutia thingpui sen hang ngei mai ka nghah veng vawng lai chuan thingpui chu tuemaw kut hian rawn keng ta va va mai hi ka tarmit phen atang ka hmu ta hlawl mai. Ngaihsak lemlo tak a ka bula mi min biakna chu chhang chungin  thingpui chu ka la a. Mahse alo sa zek mai,”awi ah”  tih pahin min petu hmel chu ka  sensory nerves vang vek chuan ka han bih ta zawk mai a. Khai le……!! Single ngat mai ka nihna kha ka brain chuan hre vatin nerves bawk chu rawn che lehin hmul thi a rawn ding ta sung sung mai a nih chu! “A sa em,ka tihpalh lutuk aw” a rawn tih lai te chuan matheiloin tihdanglamin ka awm ta ni berin ka inhria, “Lalpa, tunge i nih?” tih mai chu ka duh rum rum mai ka ti.  A zunah chuan thawklehkhatah ka uai ta hnawp a. A hming hriat ka va chak em. Chutia min kalsan leh lai te chuan a ke pen  dan leh a mawng sawih dan thleng khan ka la hre vek.

Awle, inkhawm dar alo ri ta maw tih ah chuan he venga inkhawm dawn a ka rilru put ang chu ka pu thei ta mawlh lo. Kha tleirawlte  kha ka rilru ah a awm ta reuh reuh a. Ka thiannu bulah chuan zah pawh dawnloin a hming ka han zawt ta chawt mai a, a khai, Piangi(kan in koh dan) chu lo ni rengin!

Inkhawm turin an liam dawn e.Ka hmuh hmasak leh hnu hnun ber a ni ang tih ka va hlau em chu tleirawl te chu. Engtin nge ka insawi luh ang tih chu kross thu lam ai chuan a lang ta zawk tlat mai a nih chu. Mahse min dem bik long e. A fal te a bawhzui a hrilh keuh keuh turin kan veng a inanglo a, hriat pawh kanla inhre ngai  der silo. Awle, engpawh chu nise ka thiannu bawk chu Palai hna thawk turin ka ngen leh ta chawt mai. Chuti chuan ngaihngam takin biakin lam chu kan pan ho ta a. Ka thutna  atanga a hmel lang thei chiah chiah ah chuan ka thu ta ngei bawk a.

Mahse ngaih ala ngam tak tak thei chuang lo. Kan hla sak te chu Lengzem ni ta vek hian ka hria. Inkhawm lai lai chuan ka chhuak ta chawt mai a. Ka thiannu kha lo hlawhchham ta se plan B tal nei te ang tiin ka thiante ho pun turin ka phone chu zunin phenah ka phawrh ta a. Mahse thianpa  Siamtea be dawn ila, inti fa nei takin nula lam chu min sawi pui duh dawn der silo a, ka be peih lek bawk silo. Thianpa Chuana be dawn ila nula ai chuan aritmetic velah bak min luh pui ka ring bawk silo. Zomuana lah be dawn ila nula pathum kawp lai mek a ni si a, ka tan a pawi ka hlau leh bawk si. Tihngaihna a awm ngang silo, JEHOVAH -JHIREH( intum chawp  Pathian) tih pahin Plan B chu biakin chhungah ka luh pui leh ta chawt mai a. Ban vat vat chu ka chak, mahse ka huphurh bawk si a. Lal Biakna  kan sawi tur te pawh chu ..RAMTE… tih atanga tan tawh mai a ni ka duh!

Ka nghah hlel leh huphurh em em ang chuan inkhawm chu kan bang ta. Ka bulah chuan ka thiannu chu a rawn kal a, thinphu dup dup a ka lo nghahlai tak chuan  “I thlah dawn nia”  min han ti a le. Ka va lawm em! Chuti chuan ka haw hma chuan an inlam pana thlah turin kan pahnih te chuan kan kal dun ta hnak hnak a. Sawi tur ava vang em. Rilruin “Lalpa min pui rawh , min pui rawh” tih chu Elija tawngtaina ang tluk zet a tak tha kek kawk khan ka chham zuah zuah a. Ka sawi chhuah chhun lah chu,  “kan chhungkaw zat i hria em?”,   “kg eng zat nge ka nih i rin?”,  ”chaw ka heh hmel em?”,  “ka ek laiin ka zai thin i ring em?”  tih te  chu ka tum vang pawh nilo a ka sawi te an la ni zui! Ngaihzawng lam la dailo ta  fam chu  mahni pawh kan insawi  bo lek lek dawn a lawm le. Riruin “ka thianpa chuan  sawi tur a hre ngawt ang mawle”  ka ti bul hmuk.  Kha tih lai ka rilru kamtu kha hria awmse min va khawngaih dawn teh lul em!

Ani thei tawh nganglo, an in thlen hma kawng kual kan thleng dawn ta. Sawi hun a ni tawh. Ka huaisenna zawng zawng sawm khawmin ka han inham vel ta a le, “Mapiang, manchester united tan a chakna goal ka thun hma chu ka hmangaih reng ang che” ka han ti ta ale…!! A zak lutuk chu a sen tawn tawn hian ka hria, a kawr hmawr pet chung chuan “Lt, keipawn Vanlalduata inbuan a  ka hneh hma chu ka hmangaih reng ang che” tiin min han chhang let ta ale…! Chheiraw khaih, nuam duh ngei mai. Ka rilru neuh neuh chuan “Pa min va ti dawn em”  ka ti a.

Awle, thawh  hnihna  atan   mi  tihloh dan pawh a ni biklo tih pahin a hmui sen no chak mai chu ka melh ta run mai a. Fawh hi a cho hliah hliah ni ber hian ka hria. Lungphu lah chu Chrismas zan lengkhawm tui vanglai tak ang maiin a ri tluk tluk a. Chutia pawisawilo hmel duhawm zet mai KHEROLAI  tura ka kun hniam mek lai chuan  Upa chuailova te nupa  vang vek, kan boruak an hrelo chiang kher mai. An bike rawn tlan pel chuan kan tih tur min thulh tir vek a lawm!  Chutia kan Upa ho te nen ka nih tak nuai avang chuan a dik thei tawh lo, ngaih tha leh nui sen sen pah chuan bye bye kan inti a, mahni inlam ve ve pan turin kan inher ta a.