Sernung(Scar)

October  thla tir a ni a, zan dang ang bawk in dar 9 alo rik chuan ka phone ah chuan message, ka hmangaih leh ka duh ber che ti a ka lo hril thin hnen atang chuan ka dawng leh ta. Zan dang ang thoin ka nui var var a , ”kei pawn ka ngai che a sin” tiin ka chhang let a. Reilo te ah ka phone chu amah atang alo ri nawn leh a, ka la a.

Zan dang ang thoin Hostel roof top ah chuan biak pahin ka chhoh a, kan ti ti a rei hnu chuan “hril tur che ka nei a sin” min ti a. Kei chuan engpawh min hril ta che tiin ka chhang nawn mawlh mawlh a. ”Mahse hrilh che ka hlau a ni, hrillo thei erawh ka ni silo a, i hriatchhuah hun alo la thleng dawn si a, i rilru a nat loh nan hrilh che tha ka ti si” min ti leh a.

Thil tha lemlo a ni tih chu hre reng mah ila harsatna te chu solve dun a, mi sawi hma a aman min hril te chu a pawilo e, “min hril ta che, ka thin rimlo ang ” ka ti nawn leh a.

Mahse enge a hriat teh reng ni a sawi zui duh ta lem lo, “nangmah chan che hi ka duhlo a ni”  tiin thupui a thlak leh ta daih a, a sawi leh duh ta reng reng lo. Nimahsela a rawn sawi uk tawh avang chuan thil tha lemlo a nun nghawngtu tak chu hriat sak ka duh em em lawi si a, ka zawt chhen a, ka ti lui ta a. Mahse ka han hriat chuan ka tuar zo ta lo!!!!

Kum 1 dawn chu a ni ta kan inzuina. Chhungten phailam a min vawm thlak reng avangin kum hnih chhung hian vawi 4 chiah ka haw a, kha chauh kha kan inhmuh hun chhung chu a ni. Kan awm dun hnu hnung ber chuan Capital complex ah sawn zailai dar 12 dawn thleng mai kan ti ti dun a. Ka awmah bei thlapin min ngaih thin thu te min hrilh chamchi a. Ka tello a awm a khawhar zia te chu tun thleng hian ka la hre thin.

Kan haw lam ka hnungah min ngai a ni tih hriat taka a bei reng lai chuan, “ka tan rinawm takin awmla, mipa chu i hnaih reng reng tur a nilo. Kei pawh i tan ka awm ve ang” ti a ka hrilh min chhanna “ka hmangaih che,ka tan chuan ka neihchhun i ni a, i tan chauh ka taksa, ka nunna te hi an awm ang” ti a min hrilh te kha ka la hre reng mai.

Phai lam a ka chhuk thlak san hnu pawn zantin mai a inbe thin kan ni a. Kan lunglengin kan inngai tawn em em thin. Ani nen hian sex reng reng nupa nih hun atan chauh kan sawi thin a, a fal a kan awm hlek chuan a lu chungah kut nghatin ka tawngtai sak fo thin. A chhungte pawn min ring em em a. Aizawl ka haw a piangin an in chu chaw ei nan ka hmang hmasa ber thin.

Ka chhukthlak atang thla thum a lo liam ta, October thla tir lam a ni a. Chu zan reh tak mai hnuai a thu min hrilh mawlh chuan he khawvel a ka nun chhe te ah hian sernung thi ngai reng reng lo a siam ta a nih chu!!

Zirlai tleirawl duhawm tak, virgin ngat(ka hmuhdan atang). A pian inchawih mawi leh nalh em em mai, ka nupui a nih hun chuan ti a ka lo suangtuah ruk fo mai chu; Vanduai vang nge chhingkhual valin a duhlo chung sualin a thianghlimna a thliak ta!!!!!!

A tap hawm hawm, na a tih zia chu tap ri hrawk hrawk chungin min hrilh a. Ka tan a thianghlim tawhloh zia chu sawiin a inten em em a. A chhungte hrilh dawn se Police hnenah FIR an thehlut ang a, pawngsualnu thanin a thang dawn si a.  A hrilh a ngam si lo. Kei ngei pawn chu misualpa chu  tharum nen bei dawn ila kan inkarah mel tam tak a tla a, tihtheih reng ka neilo. Ka chhungte hnehah haw dil dawn ila a chhan min zawt ang a, ka sawi chuan ka nupui tur hual hi min diriam san dawn tih erawh ka hre leh bawk si! Haw thei rual ka ni lo.

Ka tlu hnawk a, ka phone chu off-in ka mipa nihna pawh ka lan tir theilo, ka mittui a lo luang a, ka thinrim leh engmah ka tih theihlohna inbuk kual chuan ka biangah mittui a luan zung zung a. Ka rum a, ka bula leirawhchan bang chu ka hnek dawt dawt a. Ka tawngtaina a ka diksak fo thin a himna tur a ka chham te kha chhangtu an awm ta lo nge le!

Zan alo ni a, ka mitthla ah misualpa chet dan tur mawlh chu alo lang a. Muhil loin ka thinrim zankhua thak thin! Chhunah lah nise  a ngaite bawkin misualpa in ka hmangaih, diriam leh hmusit taka a thianghlimna a tihbawrhban sak lai mawlh tur chu mitthla ah alo lang leh a. Engmah tih hi ka tui lo! ka thin ava rim em!

Ka Pa(Pathian) chu ka au a, ka rilru chu a na hle a ni! Chaw ka ei theilo, zu ka inphah ta ; thlakhat chhung chu chhun leh zan hre hrang lek loin zu avang chuan ka thle nileng thin. Mahse chu pawn min hnem zo lo.  Ka nun chuan beiseina hi hla takah a dah a! Rinawmna chu a awmlo ang ah a ngai a. Mipa hi ka ten ta khawp mai. BF reng reng ka bih ta ngailo, lainatna hian ka khat zawk thin! Ka hmuh thei phawt mipa chu khawi mai ka nap thin!!

Atawp ber ah chuan he ka thuziah hi ka chung a thleng a ni. Ka mualphona chu ni hle mahse pawngsual hi ka haw thawkhat viau ta. Pawngsual a thlen tirtu in mi inhmangaihna a thendarh dan ka tawh hian palzam mai a va har em! Ngaihdam hi an phu reng emaw chu le! Pawngsual case hi a na lo lutuk lo maw!

Vawikhat chauh chu hun pawt kir thei ila, kha tleirawl thianghlim tak kha ka nuna ai chuan ka venhim kha a phu zawk a sin.

Nang chu ka rinna leh ka damchhan i ni aLei anchhedawng ah hian ka vanram i nia sin

Kan lendun ni leh kum kha ka kham thei lo

I tello chuan ka zeilo tak zet a ni.

Engtia na pawn min siam thin mahla, lo kir rawh

I tan ka awm reng a sin.