I piangthar tur a ni...

Tih tak meuhvin, tih tak meuhvin; mi tupawh tuiah leh thlarauva an pian loh chuan pathian ramah an lut thei lovang. Tisa a piang tisa a ni;thlarauva piang a piang thlarau a ni..John 3:5

Piantharna tih hi vanram ticket ah kan hmang dawn em? Hman tur a ni em? Hman chi a ni em? Hmang tura tih kan ni em? Heng zawng zawng chhang tur chuan kohhran rilru zawng zawng paihthla a Pathian ngaihsakna rilru nen han chhut chiang dawn teh ang. Kum zabi khatna laia an thil uar em em kha Baptisma hi a ni a, Baptisma hi Piantharna a ni chiah emaw chu !! Engvang nge piangthar da leh kan tam? Engvang nge piantharna ah kan chianloh? Heng zawng zawng hi chhut tham a ni.

PIANTHARNA HI ENGE?

 Greek word  a piangthar(born again)  tih hi  anothen(from above) tih a ni a. Chunglam atang a piang tihna a ni.

John 3:5 ah chuan “Mi tupawh tuiah leh thlarauva an pian  loh chuan pathian ram an lut thei lovang.Tisa piang a chu tisa a ni a, thlarauva piang a chu thlarau a ni”  tih a ni a. Nephesh(mihring/minung) kha chu natna avangin a thi tawh a, chu chu piangthar tur chu em ni le? Nikodem chuan tihian a zawt a,“Mi, a tar hnuin engtin nge a pian theih ang? A nu pumah vawi hnih lutin a piang thei em ni” tiin a zawt a. Isua  chuan “tisa a piang tisa, thlarauva piang thlarau  a ni” tiin a chhang. Nu pum chhungah chuan luta piangnawn leh tur chuan theihloh tawp a ni tih chu mimawl ber pawn a hre ngei ang le; Isua chuan “Thlarau ah “ a ti a ni(John 3:5).

Chu thlarau chu keimahni atanga lo chhuak a ni hauh lo thung a. Isua mari kawchhunga alo piang ang te, Isua vekin Nikodema hnena  thli lo kalna chu hriat a nihloh thu te a sawi ang kha a ni  a. Mihring hlui atanga mihring thar thawh lampang niloin mihringa Isua alo piannawn lehna zawk hi a ni. Dik tak zawkah chuan Pathian thlarau/thaw hi dawng vek tawh zawk kan ni a, chuvangin rawn pianthar tur lam ni tawhloin “piangnawn” tih hi tawngbul  lam atang pawn a dik zawk mah mah a ni.

UAR TAN DAN

Pathian lehkhabu(Bible) kan en chuan  OT(thuthlunghlui) hian piantharna hi a sawi ri ngai reng reng lo a, piantharna hi a pawimawhlo tawp rih tihna a ni zawk. Chuvangin piantharna hian bible pumpui hi a awh hauh lo tih a hriat theih. Vanram kaina tur ticket-a hman kan tum phei chuan subjective judgement atang Davida te, zawlnei hote kha meidilah kan hnawl thla phiar tihna a ni! Isua ngei pawh hian a uarlo khawp mai! A van lawm dawnin zirtir te hnenah vawikhat a sawi a(Marka 16:16), pakhat leh chu Nikodema hnenah a sawi leh a(John 3:5). Hei bak chu midang bula sawina reng reng a nei ta lo. Bible a thu ngawih pawimawh zual te hi chu vawi tam tak ziahlan a ni fo thin a, mahse piantharna kher hi engvanga Isua ber kherin vawihnih chauh sawi nge tih hian ngaihtuah a ti thui kher mai. Nikodema bulah lah hian a sawi tha duh der mai bawk silo!!

Piantharna tih hrim hrim hi kum zabi  2 na leh 16 inkarah kha chuan a larlo khawp mai. Alo intanna tak hi chu kum zabi 17 laia Pietist harhna, German ram a mi kha a ni. Chung ho chuan Catholic dan hlauin America ram an lo lut a, an thu ken piantharna pawh chuan reilo te ah America bakah khawthlang ram chu a la ta duak duak mai a. Kum zabi 20-na meuh ah chuan “piantharna” chu thupui leh pawimawh ber a ngaih alo ni ta a ni. He piantharna hi penticostal leh charismatic movement hian an uar leh zual a ngaih a ni thin bawk a. Mi tupawh tui ah leh thlarauva an pianloh chuan Pathian ram lutlo tura ngaih an ni!

PIANTHARNA PAWIMAWH DAN

THITHEI TAKSA HI A NUN A NGAI-

Gen 2:7 ah chuan Pathianin a anpuiin mihring a siam thu kan hmu a. Hebrai ah chuan ANPUI hi  basa -lem tih  niin, English ah chuan phantom / image  tih a ni. Taksa(nephesh) hi chu Pathian anpui a nilo! Power zawk hi Pathianin mihring a an tirna lai zawk chu a ni. Tin, Pathian hian ang nghal tur niloin ang turin a siam rih chauh zawk bawk a ni rih a.

Chu chu Setana hian a  hrechiang em em a; Eden huanah Evi a thlem pawh khan  thi thei turin a thlem te  a.Chu thei chu thihna a ni a. chhia leh tha hriatna  a ni nghal bawk!

Ei thianglo Thei hmanga sual anlo dai tak hnu chuan mihring  chu  thi thei, chhia leh tha hria  anlo ni ta chiah ! Tunge  thi thei  ta chu le??

Thlarau hi a ni em ti dawn ang aw. Mihringin Pathian hnen atanga a dawn chu thlarau a ni a, chu chu mihring chhungah a awm a, Pathian thlarau a ni(Joba 32:8) daih mai, Pathian thlarau chu a thi ve dawn der silo a! Chu vangin natna avanga thi thei chu  taksa(Nephesh) ngei hi a ni tih a chiang ta a ni! Chuvangin mihring chu thi thei alo ni ta a. Hei hi a chiang chiah lo, “chatuana thi thei” tih zawk tur a ni. Chu chu setana tum leh duh ber pawh a ni;  Gen 3:19 ah “vaivut i ni a,vaivut ah i kir leh tur a ni”  tiin mihring(Adama) chu a hrilh a. Thuhriltu 12:7 ah chuan “vaivut chu a awm angin lei ah a kir leh a,thlarau chu a petu pathian hnenah a kir leh a ni” a ni leh bawk. Mihring chu vaivut a ni a, tinungtu chu thlarau(thaw) chu a ni. Chu chu mifel ber atanga sual ber pawn kan neih vek chu a ni a. Nerves leh current siamtu chu a ni(1Korinth 2:11,Sam 146:4). Setana thang chu vaivut ah chatuana muhil pawh niloin muthlum vang vang chu min duh ber chu a ni!

THLARAUVA PIANTHARNA

Chutia mihring nunna thlarau ber mai laksaka a awm hnu chuan a thawhleh ngei ngei a ngai a ni. Chu chu Isua mission ropui tak pawh kha a ni a. Amah chu thawhlehna hmahruaitu a nih avangin a tlanna leh chhandamna chang chu a thawh ang chuan kan tholeh vek dawn tihna a ni. Chu chu thlarau piantharna hian a ken tel tlat leh pawimawh lai ber chu a ni ta a.  Mihring hlui thih leh dam lam niloin, keimahni a Isua alo chenna lam zawk hi a ni. Kan zavaia kan thih ni ah pawh he piantharna avang hian kan mihring tharin min kai tho lam niloin Isua ngeiin min kai tho ve zawk dawn tihna a ni a. Chu chu keimahni a Pathian Isua alo piannawnna hi alo ni ta a ni.

BC 3000 hmalam ah kha chuan Pathian thlarau(energy) chu kan dawng ngei tawh a, chu chu nunna chauh a ni. Tuna Isua keimahnia alo piannawnna ve lam hi chuan tawihtheihlohna lam a sin zawk a. Chu chu Paula ngeiin “sin thuah chakin ka rum a ni” a lo tih hi a nih mai hmel. Hemi atan liau liau hian setana deception alo awm ve leh a, chu chu reincarnation hi a ni! Mihring piannawn hi Isua ngeiin “tisa chu tisa” a ti ang chiah kha a ni a. Isua sawi nen hi chuan danglam tak a ni. Isua sawiah chuan thlarau vek chu thlarauvah piannawn tur a tihna zawk a ni a. keimahnia Isua alo piangnawn tih hian a fiah ber a ni.

PIANTHARNA HI MITIN TAN A NI EM

Sawi tawh ang khan Piantharna hi Isua ngei pawh hian a uarlo kan tih tawh kha. Genesis atanga bible chronology kan chhuichho ngar ngar chuan Pathian thu hian pawimawh a tih vakloh leh a tumpui ram nilo chu a ziak langlo a nihloh pawn a sawi tel ngai miahlo; entirnan, Adama thlahte chhui nan chuan hmeichhia aiin mipa ngaih pawimawh an ni zawk a, hmeichhia sawilan an ni lo. Apostle te chanchinah reng reng an family planing te, Nova lawnga chuang ramsa hming, Nova hunlaia misual te, an sualna te sawi a ni ngailo bawk a. Heilo pawh hi tam tak a awm. Mahse hei hian a tum ber chu piantharna hi bible hian a ngai pawimawhlo ta em ni aw tihna alo awm thei a ni. A chhan awm ang ilo ngaihtuah teh ang; 

Isua ala thihloh vang- Piantharna hi Isua thih hma chuan thleng thei a nilo tlat a ni. Isua vekin “I piangthar tur ka tih che hi mak tisuh” a ti a. Nikodema hi a hawi a nasa khawp mai. OT ah reng reng spiritual lam hi ngaihsak a ni vak ngailo a. Piantharna lek pheichu an hrelo tawp zawk a ni. Isua thih hnu a thil thleng tur a nih tlat avangin a thih hma hian piantharna hian awmzia a neilo a. Isua damlaiin piangthar  tia sawi tur pawh an awmlo reng a nih kha!

PIANTHARNA NGHAWNG THA LO

Piantharna nghawng thalo tih avanga piantharna hi a tha lo tihna a ni lo. Piantharna ah hian passive thingking leh active thingking a awm tihna lam a ni zawk. Mipakhat chu inkhawmpuinaah a piangthar a, thlakhat a vei hnu chuan a inkhawm thatchhe tan a,  da leh nghalin a inhre thin. Thenkhat chuan piangthar chiahlo, piangthar deuh reuh, piangthar zuai ni ten an inhria a. Heng zawng zawng hi Piangtharna hriat chianloh vang vek a ni!

Piantharna suak- Mipakhat chu alo piangthar a, mi insum thei tak a nih avangin sual pawh a hlat nghal a; chu chuan midang piangthar ve theilo chu a hmu hniam a, sual tha theilo ah a ngai a. Amahah Isua rawn piangnawn niloin amah chu piangthar niin a inhria a, chuvangin reilo te ah Thlarau chapona alo nei thin a, chu chu setana lawm zawng tak a ni!

Thenkhat chu an pianthar hian anmahni mihring chu thi a, khraws a khenbeh a, mi thara nung ta ah an inngai thin. Dik tak chuan mihring hi nerves chawl thut nilo hian a thi thei miahlo a nia; chuvangin mihring hlui khen beh a, amah thia a inhriat chuan “thi der” tihna a ni zawk. Chutiang mite chuan mithara piang tawhin an inngai a, mahse reilo te ah anmahni ah sual alo kal leh si a. Mi thara piang niin an inhre tho bawk si a. Chu chuan nasa takin piangthar nge anih a piangtharlo anih a inhambuai a. Piangthar deuh reuh, piangthar chiah silo. Midang hmuha piangthar ni tawh si, mahse amaha piangthar silo avang chuan rinhlelna te, dawina te, atna te alo nei ta thin a. Camping engzat pawh lut se rinhlenain a khat tawh thin a, chu chu setana duh ber spiritual condemption chu a ni!

Piantharna dik-  Piantharna dik takah chuan amah tih lam niloin amahah Isua alo piannawn  avangin engkim maiah Isua chu a hmasa ber a. A mihring hlui leh thar lam niloin a mihring chu a thi lo ani tih a hriat avangin amaha sual alo kal chang pawn rinhlelna a awmlo a, a ringa, a tuara, a hrethiama, a nghet em em thin. Thlemna lakah chuan Pathian hnenah a tlu lut vat mai thin a ni. He piantharna dik takah hi chuan DAKNA te a awm ve tawhlo a, helnain hmun a chang tawh lo a. Isua amahah a nung tlat avangin a thiltih chu amah tihah alo pawmsak thin avangin a lawm a, Pathian a fak fo tawh zawk thin a ni! He piantharna hi Isua kan ai alo thihna avang leh a thawhlehna anpui a nih avangin baptisma , thlarau baptisma hi chan ngei ngei a pawimawh a ni!